Ikipe ya Real Madrid yatsinze Benfica igitego 1-0 mu mukino ubanza wa kamarampaka (play-off) ya UEFA Champions League, ariko ibyishimo by’iyi ntsinzi byaburijwemo n’ibirego by’ivanguraruhu byibasiye rutahizamu Vinícius Júnior, bigatuma umukino uhagarara iminota 10.
Uyu mukino wabereye kuri Estádio da Luz mu Mujyi wa Lisbonne, waranzwe n'ishyaka ryinshi ariko uza guhindura isura ku munota wa 50 ubwo Vinícius Júnior yafunguraga amazamu ku gitego cyiza cyane yatsindishije ishoti rikomeye, umunyezamu Anatoliy Trubin ntiyabasha kurikuramo.
Uyu munya-Brésil yahawe ikarita y'umuhondo kubera uburyo yishimiyemo agakabya, biza kuvamo gushyamirana n'umukinnyi wa Benfica, Gianluca Prestianni.
Vinícius yahise yegera umusifuzi Francois Letexier amwereka ko ari gukorerwa ivanguraruhu n'abafana, mbere y'uko asohoka mu kibuga agakurikirwa na bagenzi be bose berekeza mu rwambariro. Umukino waje gusubukurwa nyuma y'iminota 10 aba bakinnyi bagarutse mu kibuga.
Nyuma y'uko umukino usubukuwe, ibintu byakomeje gushyuha kuko Umutoza wa Benfica, José Mourinho, yahawe amakarita abiri y'umuhondo yikurikiranya ku munota wa 85 asohorwa mu kibuga, bivuze ko atazaba ari ku ntebe y'ubutoza mu mukino wo kwishyura.
Kubera ihagarara ry'umukino, umusifuzi yongeyeho iminota 12 y'inyongera, ari nabwo Vinícius yatewe ikintu kivuye mu bafana kimukubita ku kuboko ubwo yiteguraga gutera koruneri.
Mbere y'uko uyu mukino uzamo izi ntugarara zose, amakipe yombi yari yagerageje kurema uburyo bwo gushaka ibitego.
Kylian Mbappé na Arda Güler babonye amahirwe akomeye ariko umunyezamu Trubin ababera ibamba, na we yakuyemo ishoti rikomeye ryatewe na Fredrik Aursnes wa Benfica. Uyu mukino kandi wagaragayemo Trent Alexander-Arnold wakinnye iminota yose atanga imipira myiza imbere y'izamu rya Benfica.
Aya makipe yombi yongeye guhura nyuma y'iminsi 19 gusa akinnye undi mukino w'amateka mu cyiciro cy'amatsinda, aho umunyezamu Trubin yatsindiye Benfica igitego n'umutwe ku munota wa 89 kiyifasha kubona itike ya play-off.
Benfica izaba isabwa kwishyura iki gitego mu mukino wo kwishyura uteganyijwe kubera i Madrid kuri Stade ya Santiago Bernabéu ku wa Gatatu, tariki ya 25 Gashyantare.
