Umutoza Mukuru w’Ikipe y’Igihugu ‘Amavubi’ Stephen Constantine yasezereye abakinnyi batanu mu mwiherero kugira ngo yuzuze umubare w'abakinnyi 26 basabwa n'amategeko ya FIFA Series mbere yo gukina umukino wa mbere na Grenada.
Abakinnyi bakuwe mu mwiherero nyuma y'imyitozo ya nyuma yabaye ku wa Kane barimo rutahizamu Nshuti Innocent ukinira Al Wafaq Ajdabia muri Libya na Ndayishimiye Karl Matteo wa KVC Wilrijk yo mu Bubiligi, bombi basezerewe kubera ibibazo by'imvune bagize.
Abandi basubijwe mu makipe yabo ni umunyezamu Niyongira Patience wa Police FC, Ruboneka Jean Bosco wa APR FC ndetse na Niyo David ukinira NK Veres Rivne FC muri Ukraine.
Aba bakinnyi basezerewe kugira ngo Ikipe y'Igihugu isigarane urutonde ntakuka rw'abakinnyi 26 bazifashishwa muri iri rushanwa, dore ko umutoza Stephen Constantine n'umwungiriza we Eric Nshimiyimana bari babanje guhamagara abakinnyi 31.
Amategeko y’Ishyirahamwe ry’Umupira w’Amaguru ku Isi agena ko ibihugu byitabira aya marushanwa y'amatsinda bigomba gukoresha abakinnyi 26 gusa.
Ikipe y'Igihugu irakina umukino wayo wa mbere na Grenada kuri uyu wa Gatanu guhera saa 21:00 kuri Stade Amahoro.
Uyu mukino urabanzirizwa n’uzahuza Kenya na Estonia guhera saa 18:00, aho amakipe azitwara neza muri iyi mikino yombi azahurira ku mukino wa nyuma uteganyijwe ku wa Mbere tariki ya 30 Werurwe 2026, naho ayatsinzwe agahatanira umwanya wa gatatu.
Mu yindi mikino y'Itsinda B yabanje ku wa Kane, yasize Aruba inyagiye Macau ibitego 4-1, mu gihe Tanzania yatsinzwe na Liechtenstein igitego 1-0.
Ibi bivuze ko Tanzania izakina na Macau bihatanira umwanya wa gatatu, mu gihe Aruba izacakirana na Liechtenstein ku mukino wa nyuma w'iri tsinda ku Cyumweru tariki ya 29 Werurwe 2026.
