Ibi bije nyuma y’umukino wo mu matsinda ya CAF Confederation Cup wabaye ku wa Gatandatu tariki 29 Ugushyingo 2025, ubera kuri Peter Mokaba Stadium muri Afurika y’Epfo.
Mu itangazo yashyize hanze, Zamalek yavuze ko imisifurire yaranze uyu mukino yagize ingaruka zikomeye ku byavuyemo. Iyi kipe ishinja Uwikunda n’abungiriza be kwima penaliti rutahizamu wayo Chico Banza, ndetse no kwanga igitego cyatsinzwe na Seifeddine Jaziri ukomoka muri Tunisia, bavuga ko cyari cyo ndetse nta mpamvu igaragara yari gutuma cyangwa.
Iyi kipe kandi yanatunze agatoki itangwa ry’amakarita y’umuhondo menshi ku bakinnyi bayo, ibintu bavuga ko byakozwe mu buryo bukabije.
Mu kirego cyayo, Zamalek ntiyagarukiye ku kurega Uwikunda gusa, ahubwo yasabye CAF ko ikoranabuhanga rya VAR ryakwihutishwa rigatangira gukoreshwa guhera ku munsi wa gatatu w’imikino y’amatsinda.
Iyi kipe ivuga ko "kutabaho kwa VAR biri kugira ingaruka ku butabera buri mu irushanwa", bityo iki kibaba ari igihe cyo gukora impinduka zifatika mu misifurire ya Afurika.
Uwikunda Samuel ushyizwe mu majwi na Zamalek, ni umwe mu basifuzi b'izina rikomeye muri aka karere no muri Afurika. Si ubwa mbere asifurira amakipe yo muri ibi bihugu kuko no muri Mata 2025 yasifuye umukino ukomeye wa 1/4 cya CAF Champions League wahuje Al Ahly na Mamelodi Sundowns.
Uyu mugabo kandi ari mu basifuzi biteganyijwe ko bazasifura imikino y’Igikombe cya Afurika cya 2025 kizabera muri Maroc kuva tariki ya 21 Ukuboza 2025 kugeza tariki ya 18 Mutarama 2026. Namara gusifura iri rushanwa, azaca agahigo ko kuba Umunyarwanda wa mbere usifuye AFCON inshuro ebyiri, dore ko yabikoze no mu 2023.
