Kuri uru rutonde rwasohotse kuri uyu wa Kane, u Rwanda rwisanze ku mwanya wa 169 ku rwego rw’Isi. Uyu ni wo mwanya wo hasi cyane iyi kipe igize kuva yabaho, bikaba bije bikurikira umwanya wa 168 yagize mu mpera z’umwaka ushize wa 2024.
Kuba Amavubi y’Abagore yatakaje uyu mwanya umwe, byatewe ahanini n’uko nta mikino mpuzamahanga iyi kipe iheruka gukina.
Iheruka kumanuka mu kibuga muri Gashyantare uyu mwaka, ubwo yahataniraga itike y’Igikombe cya Afurika igasezererwa na Misiri ku giteranyo cy’ibitego 3-2. Kuva icyo gihe, nta yindi mikino yigeze igaragaramo.
Ku mugabane wa Afurika, u Rwanda ruri ku mwanya wa 35. Ikipe y’Igihugu ya Nigeria (Super Falcons) ni yo iyoboye uyu mugabane, ikaba n’iya 37 ku rwego rw’Isi nyuma yo kwitwara neza no gutwara Igikombe cya Afurika giheruka.
Mu karere u Rwanda ruherereyemo, ibihugu by’ibituranyi bihagaze gutya:
- RDC: 109
- Tanzania: 121
- Uganda: 133
- U Burundi: 179
Ku rwego rw’Isi muri rusange, Espagne iracyayoboye izindi, igakurikirwa na Leta Zunze Ubumwe za Amerika, naho u Budage bugafata umwanya wa gatatu. U Bwongereza buheruka kwegukana EURO 2025 buri ku mwanya wa kane, mu gihe Suède yamanutse ikaba iya gatanu.
Muri rusange, uru rutonde rwa nyuma rwa 2025 ruriho ibihugu 198, harimo 44 byo muri Afurika, nyuma y’uko ibihugu nka Sudani, Mauritania na Eritrea bitagaragaye kuri iyi nshuro.
Leave a Comment