‎Ikipe y'Igihugu ya Leta Zunze Ubumwe za Amerika yabaye iya kabiri ibonye itike yo gukina ijonjora rya 32  ry'Igikombe cy'Isi cya 2026 nyuma yo gutsinda Australia ibitego 2-0, mu gihe Brazil yabonye intsinzi yayo ya mbere inyagiye Haiti ibitego 3-0, yiyongerera amahirwe akomeye yo gukomeza.
‎
‎Leta Zunze Ubumwe za Amerika zitozwa na Mauricio Pochettino, zageze kuri iyi ntsinzi zibikesha ibitego bibiri byabonetse mu gice cya mbere. Ku munota wa 11, Cameron Burgess yitsinze igitego mbere y'uko Alex Freeman ashyiramo icya kabiri ku munota wa 45.
‎
Iyi ntsinzi yabonetse imbere y'abafana 72,000 bari muri Stade ya Lumen Field mu Mujyi wa Seattle, yatumye iyi kipe igira amanota atandatu mu Itsinda D, ikurikira Mexique mu makipe yamaze gukatisha itike adategereje umukino wa nyuma w'amatsinda.
‎
‎Ku rundi ruhande, Ikipe y'Igihugu ya Brazil yari yatangiye inganya na Maroc, yisubiyeho mu Itsinda C itsinda Haiti ibitego 3-0 byose byabonetse mu gice cya mbere.
‎
Rutahizamu wa Manchester United, Matheus Cunha, yatsinze ibitego bibiri harimo n'icyo ku munota wa 36, mu gihe Vinicius Junior ukinira Real Madrid yashyizemo igitego cya gatatu mu minota y'inyongera y'igice cya mbere. Ibi byatumye Brazil yuzuza amanota ane, inahita isezerera Haiti mu irushanwa.
‎
‎Mu yindi mikino yabaye, Maroc yatsinze Scotland igitego 1-0 bituma iyobora Itsinda C n'amanota ane inganya na Brazil ariko ikayirusha ibitego, mu gihe Scotland isigaranye amanota atatu.
‎
Mu Itsinda D rya Leta Zunze Ubumwe za Amerika, Paraguay yatsinze Turukiya igitego 1-0 yuzuza amanota atatu, bituma Turukiya ihita isezererwa mu irushanwa nyuma yo gutsindwa imikino yayo ibiri ibanza.
‎
‎Biteganyijwe ko mu mikino ya nyuma y'amatsinda, Brazil izahura na Scotland mu Mujyi wa Miami ishakisha itike ndakuka iyihesha gukomeza, mu gihe Leta Zunze Ubumwe za Amerika zizakina na Turukiya yamaze gusezererwa idafite inota na rimwe.