‎Ikipe ya APR FC yamaze gutangaza ku mugaragaro ko yasinyishije amasezerano y'imyaka ibiri rutahizamu ukomoka muri Côte d’Ivoire, Amani Kouadio Kan Michel Breygeneve. Uyu mukinnyi w'imyaka 27 ukina asatira anyuze ku ruhande rw'ibumoso, abaye umunyamahanga wa mbere iyi kipe itangaje mu bakinnyi bashya yaguze muri iyi mpeshyi.

‎

‎Amani Kouadio Kan yerekeje mu Ikipe y'Ingabo z'Igihugu avuye muri AFAD Djékanou (izwi nka AFAD Plateau) y'iwabo muri Côte d’Ivoire. 

‎

Muri uyu mwaka w'imikino wa 2025/2026 uheruka, uyu rutahizamu ni we watsinze ibitego byinshi muri iyi shampiyona nyuma yo kwinjiza ibitego 17. Mu ruhando Nyafurika, mu mikino ine ya CAF Confederation Cup yakinnye, yatsinzemo ibitego bibiri anatanga umupira umwe wavuyemo igitego (assist).

‎

‎Uyu rutahizamu yageze mu Rwanda ku wa Gatandatu w'icyumweru gishize, akaba yarabanje gukora ikizamini cy'ubuzima nyuma yo kugitsinda ahita ashyira umukono ku masezerano. 

‎

Mu butumwa APR FC yanyujije ku mbuga nkoranyambaga zayo, yamuhaye ikaze mu muryango w'Intare, itangaza ko azajya yambara nimero 17 mu mugongo. 

‎

‎Amani Kouadio yageze i Kigali ari kumwe n'abandi bakinnyi b'abanyamahanga na bo bategerejwe gutangazwa mu minsi iri imbere, barimo umunyezamu Ernan Siluane ukomoka muri Mozambique, Mamadou Traore ukomoka muri Mali ndetse hakaba hari n'abandi nka Madou Zon wavuye muri TP Mazembe. 

‎

Kugeza ubu, Amani abaye umukinnyi wa kabiri ushyizwe hanze na APR FC mu bakinnyi bashya, nyuma y'Umunyarwanda myugariro w'ibumoso Ishimwe Christian wavuye muri Police FC.