Ikipe ya Arsenal yabaye iy'imbere mu Bwongereza ibashije gukatisha itike ya kimwe cya kane (1/4) cya UEFA Champions League y'umwaka w'imikino wa 2025/26 nyuma yo gutsinda Bayer Leverkusen, mu gihe andi makipe yo muri iki gihugu arimo Chelsea na Manchester City yasezerewe rugikubita.
Mu mikino yo kwishyura ya 1/8 yakinwe mu ijoro ryo ku wa Kabiri tariki ya 17 Werurwe 2026, Arsenal yakiriye Bayer Leverkusen yo mu Budage kuri Emirates Stadium isabwa gushaka intsinzi kuko umukino ubanza yari yawunganyijemo igitego 1-1.
Iyi kipe y'i Londres yitwaye neza imbere y'abafana bayo ibona intsinzi y'ibitego 2-0.
Igitego cya mbere cyatsinzwe na Eberechi Eze ku munota wa 36, mu gihe ikindi cyashyizwemo na Declan Rice ku munota wa 63, bituma Arsenal ikomeza ku giteranyo cy'ibitego 3-1 mu mikino yombi.
Ibyishimo by'Abongereza ariko ntibyakomeje kuko Manchester City yari yakiriye Real Madrid kuri Etihad Stadium yasezerewe, inaniwe kwishyura ibitego 3-0 yari yatsindiwe muri Espagne mu mukino ubanza.
Ibyago bya Man City byatangiye kare ubwo Bernardo Silva yakoraga umupira n'amaboko ari mu rubuga rw'amahina ku munota wa 17, agahabwa ikarita itukura ndetse ikipe ye igaterwa penaliti. Iyi penaliti yinjijwe neza na Vinicius Junior, ishyira Real Madrid imbere.
N'ubwo Man City yari isigaye ari abakinnyi 10, yagerageje gushaka igitego cyo kwishyura ikibona binyuze kuri Erling Haaland ku munota wa 41.
Gusa, mu minota y'inyongera y'igice cya kabiri (90+3'), Vinicius Junior yongeye kurekura ishoti rikomeye ku mupira yari ahawe na Aurélien Tchouaméni, atsinda igitego cya kabiri cya Real Madrid, umukino urangira ari 2-1.
Ibi byatumye Real Madrid ikomeza ku giteranyo cy'ibitego 5-1.
Ikipe ya Chelsea na yo yahuye n'uruva gusenya imbere y'abafana bayo i Stamford Bridge, inyagirwa na Paris Saint-Germain (PSG) ibitego 3-0 byaje byiyongera kuri 5-2 yari yatsinzwe mu mukino ubanza.
PSG yakomeje ku giteranyo cy'ibitego 8-2 ibifashijwemo n'ibitego bya Khvicha Kvaratskhelia (6'), Bradley Barcola (14'), na Senny Mayulu (62').
Mu wundi mukino wabaye, Sporting CP yo muri Portugal yanditse amateka yo kwishyura ibitego 3-0 yari yatsinzwe na FK Bodø/Glimt yo muri Norvège mu mukino ubanza, iyinyagira ibitego 5-0 mu mukino wo kwishyura, ihita ikomeza ku giteranyo cya 5-3.
Ibitego bya Sporting byatsinzwe na Gonçalo Inácio, Pedro Gonçalves, Luis Suárez, Maximiliano Araújo na Rafael Nel.
Imikino yo kwishyura ya 1/8 irakomeza kuri uyu wa Gatatu tariki ya 18 Werurwe 2026, aho FC Barcelona irakira Newcastle United, Bayern Munich ikine na Atalanta, Liverpool yakire Galatasaray, naho Tottenham Hotspur yishakemo igisubizo imbere ya Atletico Madrid.
Leave a Comment