‎Ikipe y'Igihugu ya Aruba yanditse amateka yo kwegukana igikombe cya mbere cya FIFA Series 2026 i Kigali nyuma yo kunyagira Liechtenstein ibitego 4-1 mu mukino wa nyuma w'Itsinda B wabereye kuri Kigali Pelé Stadium i Nyamirambo kuri iki Cyumweru tariki ya 29 Werurwe 2026.

‎

‎Uyu mukino wahuzaga amakipe yombi yari yitwaye neza mu mikino ibanza y'iri tsinda watangiye amakipe yigana, ariko Aruba itangira kugaragaza inyota y'igitego hakiri kare. 

‎

Ku munota wa 18 gusa, Aruba yafunguye amazamu ku gitego cyatsinzwe na Jaybrien Romano n'umutwe nyuma y'umupira mwiza yari aherejwe na Gello Robertha.

‎

‎Aruba yakomeje kwiharira umukino biza kuyihesha igitego cya kabiri ku munota wa 25 cyatsinzwe na Gello Robertha wari wagize uruhare ku gitego cya mbere, atera ishoti rikomeye ari kure y'izamu riruhukira mu nshundura, igice cya mbere kirangira Aruba iyoboye n'ibitego 2-0.

‎

‎Igice cya kabiri kigitangira Liechtenstein yakoze impinduka ishaka kwishyura, ndetse ibigeraho ku munota wa 53 ibifashijwemo na Emanuel Zund watsinze igitego cya mbere. 

‎

Ibi byongereye igitutu kuri Aruba kuko ku munota wa 61 umukinnyi wayo wo hagati Ostiana Rovien yeretswe ikarita y'umutuku n'umusifuzi Uwikunda Samuel nyuma yo guhabwa ikarita ya kabiri y'umuhondo azize gukora umupira n'intoki.

‎

‎N'ubwo Aruba yari isigaye ari abakinnyi 10 mu kibuga, ntiyacitse intege kuko ku munota wa 69 yabonye igitego cya gatatu gitsinzwe na Rainey Breinburg ku ishoti rikomeye yateye ari hanze y'urubuga rw'amahina. 

‎

Agashinguracumu katsinzwe ku munota wa 94 kavuye ku ikosa rya myugariro wa Liechtenstein, Hofer Jens, witsinze ashaka kwambura umupira Conner van Kilsdonk wari wacenze umunyezamu, umukino urangira ari 4-1.

‎

‎Mbere y'uyu mukino wa nyuma Tanzania yari yegukanye umwanya wa gatatu mu Itsinda B nyuma yo kunyagira Macau ibitego 6-0. 

‎

Ibi bitego byatsinzwe na Amancio witsinze icya mbere ku munota wa 16, Bakari Mwamnyeto, Mudathir Yahya, Paul Peter, Novatus Miroshi na Tarryn Allarakhia.

‎

‎Iri rushanwa rya FIFA Series 2026 rizasozwa ku wa Mbere tariki ya 30 Werurwe 2026 kuri Stade Amahoro hakinwa imikino ya nyuma y'Itsinda A, aho Kenya izakina na Grenada Saa Kumi z'umugoroba (16:00) ihatanira umwanya wa gatatu, mbere y'uko Ikipe y'Igihugu y'u Rwanda ikina umukino wa nyuma na Estonia guhera Saa Moya n'Igice (19:30).