‎Impuzamashyirahamwe y’Umupira w’Amaguru muri Afurika (CAF) yatangaje ko Ikipe y'Igihugu ya Sénégal yambuwe Igikombe cya Afurika cya 2025 (AFCON 2025) yari yatwaye, yemeza ko iki gikombe cyegukanywe na Maroc nyuma y'uko Sénégal itewe mpaga y'ibitego 3-0 kubera imyitwarire mibi yaranze umukino wa nyuma.

‎

‎Uyu mwanzuro ukomeye watangajwe mu ijoro ryo ku wa Kabiri tariki ya 17 Werurwe 2026 nyuma y'uko Akanama gashinzwe Ubujurire muri CAF kumvise ubusabe bwatanzwe n'Ishyirahamwe ry'Umupira w'Amaguru muri Maroc (FRMF). 

‎

‎CAF yasobanuye ko uyu mwanzuro wafashwe hashingiwe ku ngingo ya 82 n'iya 84 z'amategeko agenga iri rushanwa, ziteganya ko ikipe yanze gukina cyangwa ikava mu kibuga mbere y'uko umukino urangira itabiherewe uburenganzira n'umusifuzi, ifatwa nk'iyatsinzwe ndetse igaterwa mpaga y'ibitego 3-0. 

‎

‎Ibi bishingiye ku byabaye mu mukino wa nyuma wabereye i Rabat tariki ya 18 Mutarama 2026, ubwo umutoza wa Sénégal, Pape Thiaw, yasabaga abakinnyi be kuva mu kibuga umukino ugeze ku munota wa munani w'inyongera. 

‎

Ibi byabaye nyuma y'uko umusifuzi Jean Jacques Ndala yifashishije ikoranabuhanga rya VAR agaha Maroc penaliti idashidikanywaho mu gihe yari amaze kwima Sénégal igitego yatsinze binyuze kuri Ismaila Sarr.

‎

‎Nubwo abakinnyi ba Sénégal bagarutse mu kibuga nyuma y'iminota 17, penaliti ya Maroc yatewe na Brahim Diaz ikurwamo na Edouard Mendy mbere y'uko Pape Gueye atsindira Sénégal igitego cy'intsinzi mu minota y'inyongera isanzwe y'umukino, CAF yemeje ko igikorwa cyo kuva mu kibuga mbere ubwacyo cyari ihonyora ry'amategeko.

‎

‎Ishyirahamwe ry'Umupira w'Amaguru muri Sénégal ryahise ryamagana uyu mwanzuro riwita “udakwiye, utarabaho kandi wambika isura mbi umupira wa Afurika,” ritangaza ko rigiye kujuririra mu Rukiko Nkemurampaka rwa Siporo (CAS).

‎

 Bamwe mu bakinnyi ba Sénégal barimo Ismaila Sarr na El Hadji Malick Diouf bagaragaje akababaro kabo binyuze ku mbuga nkoranyambaga, bashimangira ko ari bo batwaye igikombe.

‎

‎Ku rundi ruhande, FRMF yatangaje ko ubujurire bwayo butari bugamije kwambura agaciro imbaraga abakinnyi bashyize mu kibuga, ahubwo bwari ubusabe bwo kubahiriza amategeko agenga amarushanwa.

‎

‎Muri iyi myanzuro mishya, CAF yagabanyije ibihano bitandukanye yari yafatiye Maroc ku wa 28 Mutarama.

‎

 Amande ya miliyoni 291 Frw (200,000 USD) FRMF yari yaciwe kubera imyitwarire mibi y'abatoragura imipira yagabanyijwe agirwa ibihumbi 50 USD, naho amande y'ibihumbi 15 USD yari yaciwe kubera urumuri rwa 'lasers' rwakoreshejwe n'abafana agirwa ibihumbi 10 USD. 

‎

Ismaël Saibar wari wahagaritswe imikino itatu agakurwaho n'amande ya 100,000 USD yahanaguweho amande yose, igihano kigirwa kudakina imikino ibiri gusa.

‎

‎Gusa, amande y'ibihumbi 100 by'amadolari (asaga miliyoni 145 Frw) Maroc yari yaciwe kubera imyitwarire y'abakinnyi n'abatoza bagiye kubangamira abasifuzi mu cyumba cya VAR yo yagumishijweho.