Ikipe ya Rayon Sports yatangaje ko yatandukanye n'Umutoza Mukuru wayo ukomoka mu Bufaransa, Bruno Ferry, ku bwumvikane bw'impande zombi, nyuma y'amezi atatu gusa ahawe inshingano zo kuyobora iyi kipe.
Ubuyobozi bw'iyi kipe bwabitangaje binyuze mu butumwa bwanyujijwe ku mbuga nkoranyambaga zayo mu ijoro ryo ku wa Gatanu tariki ya 20 Werurwe 2026.
Iri tangazo rigira riti “Ku bwumvikane bw’impande zombi, ikipe ya Rayon Sports yatandukanye na Bruno Ferry wari umutoza mukuru. Mwarakoze cyane umutoza Bruno Ferry.”
Uyu mugabo w'imyaka 58 yari yahawe amasezerano y'amezi atandatu mu Ukuboza 2025 asimbuye Afhamia Lotfi na we wari wirukanwe amaze amezi atatu ahawe akazi.
Bruno Ferry asize Rayon Sports ku mwanya wa gatanu muri Shampiyona n'amanota 39, aho yayitoje imikino 16 atsindamo itanu, atsindwa ibiri, ananganya imikino icyenda irimo n'itandatu iheruka.
N'ubwo atagize umusaruro mwiza muri Shampiyona, uyu mutoza yatandukanye n'iyi kipe nyuma y'iminsi ibiri gusa ayihesheje itike ya 1/2 cy'Igikombe cy'Amahoro.
Muri iryo rushanwa yasezereye Police FC ayitsinze kuri penaliti 4-2 nyuma y'uko imikino yombi yari yarangiye amakipe anganya ibitego 0-0.
Inshingano zo gutoza ikipe by'agateganyo zahawe uwari umutoza wungirije Lomami Marcel uzafatanya n'umutoza w'abanyezamu Ndayishimiye Eric uzwi nka 'Bakame' ndetse n'uwongerera imbaraga abakinnyi Mwambali Serge.
Aba batoza ni bo bazayobora umukino w'umunsi wa 25 wa Shampiyona Rayon Sports izakiramo Gasogi United FC ku Cyumweru tariki ya 22 Werurwe 2026 kuri Stade Amahoro.
Leave a Comment