‎Ikipe ya Rayon Sports y'Abagore yegukanye Igikombe cya Shampiyona y'Icyiciro cya Mbere ku nshuro ya gatatu yikurikiranya nyuma yo gutsinda Muhazi United igitego 1-0 ku mukino wa nyuma wabereye mu Nzove.
‎
‎Kuri iki Cyumweru tariki ya 5 Mata 2026 ni bwo iyi kipe yambara ubururu n'umweru yakinnye umukino w'Umunsi wa 22 wa Rwanda Women Super League 2025/2026 isabwa kunganya gusa kugira ngo yegukane iki gikombe.
‎
‎Mu gice cya mbere amakipe yombi yakinnye yigana bityo uburyo bwo kubona ibitego buba buke, n'ubwo ku munota wa 30 Nguema Odette wa Rayon Sports yagerageje gutera amashoti ya kure.
‎
Iki gice cyarangiye ari ubusa ku busa.
‎
‎Mu gice cya kabiri Muhazi United yakomeje gukina yugarira cyane, ariko ku munota wa 62 rutahizamu Gikundiro Scholastique abona uburyo. Yateye ishoti rikomeye ari nko muri metero 27 aroba umunyezamu Usanase Djamila umupira uruhukira mu rushundura, n'ubwo  yari yamubereye ibamba mbere yaho.
‎
‎Nta kindi gitego cyabonetse muri uyu mukino witabiriwe na Perezida wa FERWAFA, Shema Ngoga Fabrice na Komiseri w'Umupira w'Abagore, Nikita Gicanda Vervelde.
‎
‎Gutsinda uyu mukino byatumye Rayon Sports yegukana Igikombe cya Shampiyona n'amanota 57 ikaba izigamye ibitego 63, igakurikirwa na Police WFC yagize amanota 54 ikazigama ibitego 46, naho Indahangarwa WFC isoreza ku mwanya wa gatatu.
‎
‎Muri uyu mwaka ibihembo byarazamuwe kuko Rayon Sports yahawe miliyoni 20 Frw, Police WFC ihabwa miliyoni 15 Frw, iya gatatu miliyoni 10 Frw, iya kane miliyoni 8 Frw, iya gatanu miliyoni 6 Frw, naho iya gatandatu ihabwa miliyoni 4 Frw.
‎
‎Perezida wa Rayon Sports, Murenzi Abdallah, yagaragaje ibyishimo bye ashimira FERWAFA ku bw'ibihembo byazamuwe, asobanura ko bizabafasha mu kwitegura amarushanwa mpuzamahanga.
‎
‎Yagize ati "Ubu tugiye kubaka ikipe izahatana muri CECAFA no muri Champions League ndetse izanatwara ibikombe byose bikinirwa mu Rwanda. Umwaka ushize byaratugoye, twakoze urugendo rurerure, ubu rero amarushanwa azabera iwacu. Tugiye kongeramo imbaraga ku buryo tuzerekana ko abakobwa bacu bagera mu matsinda."
‎
‎Rayon Sports ibaye ikipe ya kabiri itwaye ibikombe bitatu bya Shampiyona yikurikiranya kuva yazamuka mu Cyiciro cya Mbere muri 2023. Ikurikira AS Kigali yatwaye 10 yikurikiranya kuva mu 2008 kugeza 2018. Iyi kipe iracyafite amahirwe mu Gikombe cy'Amahoro kuko iheruka gutsinda Bright Raya WFC igitego 1-0 mu mukino ubanza wa 1/8.