Perezida wa Rayon Sports, Murenzi Abdallah, yemeje aya makuru y'iyi mikoranire mishya asobanura ko iki kigo cy'imari kije gushyira akadomo ku bibazo by'amikoro byakunze kurangwa muri iyi kipe birimo gukererwa guhemba abakinnyi no kubura ingengo y'imari.
Yagize ati "Ni ikigo kinini cy’imari tuzafatanya mu bintu byinshi, bya bibazo twajyaga tugira nk’imishahara itabonekera igihe, ingengo y’imari itabonekera igihe, BK ije kubishyiraho akadomo. Ije gutanga igisubizo kirambye kuri bya bibazo by’amikoro twahoranaga."
Kujya ku gatuza kwa Banki ya Kigali ntibivuze ko Rayon Sports yatandukanye burundu na SKOL Brewery Ltd nk'uko byavugwaga kuko ubuyobozi bwemeje ko mu minsi itarenze icyumweru kimwe hazavugururwa amasezerano y'imikoranire ashingiye ku kubyaza umusaruro ibikorwaremezo n'ubundi buryo bwo kwamamaza.
Murenzi yashimangiye ko ibi ari ibisanzwe mu mupira w'amaguru agira ati "Ntabwo ari we mufatanyabikorwa uzaba ari imbere ku mwambaro wa Rayon Sports bitewe n’uko twabonye umuterankunga mukuru wundi. Maze iminsi numva abantu bavuga ngo Rayon Sports na Skol byaratandukanye, ariko ni ibihuha, ni ibinyoma bidafite ishingiro."
Biteganyijwe ko mu minsi iri imbere Rayon Sports izamurika imyambaro mishya izajya yambara mu myaka itanu iriho ibirango bya Banki ya Kigali ndetse na Jayrutty Investment bafitanye amasezerano y'igihe kirekire.
Muri iyi mikoranire mishya igamije kuzamura ubukungu bw'ikipe, Rayon Sports inafite abandi bafatanyabikorwa barimo Sosiyete y'Itumanaho ya Airtel izafasha mu kugura bisi nshya ikanatanga hagati ya 30% na 40% by'ingengo y'imari igenda ku ngendo z'ikipe zitwara arenga miliyoni 50 Frw ku mwaka.
Leave a Comment