Ikipe y'Igihugu y'u Budage yageze mu mikino yo gukuranamo y'ijonjora rya 32 (1/16) mu Gikombe cy'Isi bwa mbere kuva mu mwaka wa 2014, nyuma yo kwishyura igitego yari yatsinzwe, ikanigaranzura Côte d'Ivoire iyitsinze ibitego 2-1 mu mukino wabereye kuri Toronto Stadium muri Canada.
Intwari y'uyu mukino yabaye rutahizamu Deniz Undav winjiye mu kibuga asimbura, agatsinda ibitego bibiri byikurikiranya, harimo n'icy'agashyinguracumu yashyizemo ku munota wa 94 w'inyongera.
Ibi byahesheje u Budage amanota atatu y'ingenzi imbere y'abafana bagera ku 43,036 bari bitabiriye uyu mukino, binashyira iherezo ku muvumo wari umaze imyaka iyi kipe isezerewe mu matsinda y'Igikombe cy'Isi cya 2018 n'icya 2022.
Umukino wabanje kugora cyane u Budage kuko Côte d’Ivoire yari yafunguye amazamu ku munota wa 30, ku gitego cyatsinzwe na Kapiteni Franck Kessie nyuma y'akazi katoroshye kari gakozwe n'umusore w'imyaka 19, Yan Diomande.
Mbere y'uko Côte d'Ivoire itsinda, u Budage bwari bwagerageje gushaka ibitego ariko bwimwa amahirwe n'umusifuzi Juan Gabriel Benitez, ubwo yangaga igitego cya Aleksandar Pavlovic ku munota wa 22, yemeza ko habayeho ikosa ku munyezamu Yahia Fofana.
Ku munota wa 38, Kai Havertz na we yatsinze ikindi gitego ariko cyongera kwangwa kubera ikosa ryari ryakozwe na Jamal Musiala mbere y'uko cyinjira.
Icyahinduye isura y'uyu mukino ni impinduka ebyiri zakozwe n'umutoza w'u Budage, Julian Nagelsmann, ku munota wa 60 ubwo yinjizaga mu kibuga Deniz Undav na Nadiem Amiri.
Nyuma y'iminota umunani gusa, Amiri yahaye umupira mwiza Undav ahita yishyura igitego cya mbere. Ubwo umukino waganaga ku musozo, uyu musore yahawe undi mupira na Felix Nmecha atsinda igitego cya kabiri cyahesheje intsinzi u Budage.
Kugeza ubu, Côte d’Ivoire iracyafite amahirwe yo kuzamuka mu Itsinda E niramuka itsinze ikipe ya Curacao iheruka kwinjizwa ibitego 7-1 n'u Budage, mu mukino wa nyuma w'amatsinda uzabera mu Mujyi wa Philadelphia.
Ku rundi ruhande, u Budage bwamaze gukomeza buzakina umukino wabwo wa nyuma na Ecuador ku wa Kane tariki ya 25 Kamena 2026.
Leave a Comment