Ibi byatangajwe na Chairman wa APR FC, Brig Gen Deo Rusanganwa, washimangiye ko APR FC ari ikipe igendera ku mahame n'ikinyabupfura cya gisirikare, bityo ko nta mukinnyi ukwiriye kugaragara uko yishakiye, cyane cyane ku bijyanye n’imisatsi (Dreadlocks) n’ubwanwa.
Mu kiganiro yagiranye na Isibo TV, Brig Gen Rusanganwa yavuze yeruye ko umukinnyi utazajya mu murongo w’indangagaciro z’ikipe, imiryango ifunguye kugira ngo agende.
Yagize ati "Abo tubana nibemere indangagaciro zacu tubane na bo. None se ikipe yavaho ngo ni uko umukinnyi yanze kuvanaho umusatsi? Nutabyemera uzitahire rwose ugende amahoro nta kibazo.”
Umuyobozi wa APR FC yasobanuye ko iyi kipe yashinzwe na Perezida wa Repubulika, bityo ikaba igomba kugendera ku mabwiriza y’Ingabo z’Igihugu. Yatanze urugero kuri we bwite nk’umusirikare, avuga ko adashobora kwemera ko umukinnyi ayoboye agaragara nabi kandi we atari ko ameze.
Yagize ati "Hari indangagaciro za gisirikare zirimo kugaragara neza. Mwari mwabona mfite ubwanwa? Buriya mba nabwogoshe. None se nzaba ntashobora kujya muri iriya nzu irimo ubuyobozi bwacu ntafite ubwanwa, noneho nkajyana n’umukinnyi ufite ubwanwa nk'ubwa ruhaya? Ntabwo byakwemerwa.”
Hashize iminsi bamwe mu bakinnyi ba APR FC bari basanzwe bafite imisatsi myinshi na ‘Dreadlocks’ biyogosheje kugira ngo bubahirize aya mabwiriza mashya.
Gusa, kugeza ubu rutahizamu ukomoka muri Burkina Faso, Djibril Ouattara, ari we utarakurikiza aya mabwiriza kuko aracyafite umusatsi yari asanganywe, ibintu byatumye hari amakuru avuga ko ashobora kuba yaranze kogoshwa.
