APR FC yananiwe kubona amanota atatu imbere ya AS Kigali, amakipe yombi anganya igitego 1-1 mu mukino w’Umunsi wa Cyenda wa Shampiyona wabereye kuri Kigali Pelé Stadium kuri uyu wa Gatanu.
Iri nota rimwe ryatumye APR FC ifata umwanya wa kabiri n’amanota 15, aho inganya na Musanze FC na Gasogi United zitarakina imikino yazo, mu gihe AS Kigali yagize amanota icyenda iguma ku mwanya wa 11.
Ikipe y’Ingabo z’Igihugu ni yo yafunguye amazamu ku munota wa 41 ibifashijwemo na Ruboneka Bosco wateye neza 'coup-franc' yaturutse ku ikosa Ndayishimiye Didier yari akoreye Niyomugabo Claude.
Icyakora, ibyishimo bya APR FC ntibyamaze kabiri kuko AS Kigali yagarutse mu gice cya kabiri yariye karungu, ihita yishyura ku munota wa 49. Igitego cyatsinzwe na Ndayishimiye Didier ku mupira mwiza yahawe na Tuyisenge Arsene, awushyira mu rushundura.
Nyuma yo kwishyurwa, APR FC yakoze impinduka zitandukanye, umutoza Taleb Abderrahim yinjiza abakinnyi nka Mamadou Sy, Djibril Ouattara na Mugisha Gilbert bashakisha igitego cy’intsinzi, ariko ubwugarizi bwa AS Kigali buyobowe na Isaac Eze na Franklin Onyeabor bubabera ibamba.
Mu minota ya nyuma, APR FC yabonye uburyo bukomeye binyuze kuri Hakim Kiwanuka ntibabubyaza umusaruro, ari nako ku ruhande rwa AS Kigali Moloko Jesus nawe yabonye amahirwe imbere y'izamu, ariko umunyezamu Ishimwe Pierre na bagenzi be babasha kurokoka izamu ryabo.
Ruboneka Bosco watsinze igitego cya APR FC ni we watowe nk’Umukinnyi Mwiza w’Umukino (Man of the Match), ahabwa sheki y’ibihumbi 100 Frw.
Kuri ubu APR FC iritegura gukina ikirarane izahuramo na Etincelles FC ku wa Kabiri utaha, mu gihe shampiyona izakomeza ku wa Gatandatu hakinwa indi mikino y'Umunsi wa Cyenda.
Ku munsi w'ejo ku wa Gatandatu, Rutsiro izakira AS Muhanga i Rubavu, Gicumbi FC yakire Rayon Sports kuri Kigali Pelé Stadium, mu gihe Amagaju FC azakira Gasogi United i Huye kuri Stade Kamena. Imikino yose izakinwa saa Cyenda.
