Ikipe y’Igihugu ya Maroc yakiriye imikino ya CAN 2025, yakatishije itike ya ¼ cy’irangiza nyuma yo gutsinda Tanzania igitego 1-0 bigoranye i Rabat, mu gihe Cameroun yasezereye Afurika y’Epfo iyitsinze 2-1; ibivuze ko aya makipe yombi y’ibihangange agiye guhurira mu mukino ukomeye wo gushaka itike ya ½.
Imikino ya 1/8 yabaye kuri iki Cyumweru tariki ya 4 Mutarama 2026, yasize Maroc ikomeje urugendo rwo gushaka igikombe cya mbere cya Afurika kuva mu 1976, naho Cameroun yo igashaka kwiyongerera icyizere nyuma y’ibihe bigoye yanyuzemo.
Mu mukino wabereye kuri Stade Prince Moulay Abdallah, ‘Intare za Atlas’ zahuye n’akazi katoroshye imbere ya Tanzania yakinnye yugarira bikomeye.
Byasabye ubuhanga bwa Brahim Diaz watsinze igitego kimwe rukumbi cyabonetse muri uyu mukino mu gice cya kabiri.
Igitego cya Diaz cyaje ku mupira mwiza yahawe na Kapiteni Achraf Hakimi wari ugarutse mu kibuga bwa mbere abanza imbere nyuma y’amezi abiri y’imvune.
Hakimi yazamukanye umupira iburyo, awuhereza neza Diaz na we utazuyaje awutera mu nguni yo hafi y’umunyezamu Hussein Masalanga.
Iki gitego cyatumye Brahim Diaz yandika amateka yo kuba umukinnyi wa mbere wa Maroc utsinze ibitego mu mikino ine yikurikiranya mu Gikombe cya Afurika.
Tanzania, nubwo yasezerewe, yihagazeho kuko mbere y’igitego cya Maroc, Feisal Salum yari yabonye uburyo bwiza bwo gufungura amazamu, ariko ishoti rye riciye hejuru y’izamu rya Yassine Bounou.
Ikipe ya ‘Taifa Stars’ kandi yasabye penaliti mu minota y’inyongera ubwo Iddy Nado yagwaga mu rubuga rw’amahina, ariko umusifuzi avuga ko nta kosa ryabaye.
Mu wundi mukino wabereye kuri Al Medina Stadium i Rabat, Cameroun ‘Les Lions Indomptables’ yasezereye Afurika y’Epfo (Bafana Bafana) iyitsinze ibitego 2-1.
Junior Tchamadeu ni we wafunguye amazamu ku ruhande rwa Cameroun ku munota wa 34, nyuma y’uko ishoti rya Carlos Baleba ryari rigaruriwe mu nzira.
Christian Kofane w’imyaka 19, yashyizemo igitego cya kabiri ku munota wa 47 n’umutwe, ku mupira mwiza wari uvuye kuri Mahamadou Nagida.
Afurika y’Epfo yabonye impozamarira ku munota wa 88 ibifashijwemo na Evidence Makgopa, ariko ntibyababuza gusezererwa, bituma Umutoza wabo Hugo Broos atabasha guhigika Cameroun yigeze guhesha igikombe cya Afurika mu 2017.
Gukomeza kwa Maroc na Cameroun bivuze ko zizahura muri ¼ cy’irangiza ku wa Gatanu, tariki ya 9 Mutarama 2026. Uyu mukino uzahuza Maroc ishyigikiwe n’abafana bayo mu rugo, na Cameroun ifite ibikombe bitanu bya Afurika, ukaba witezweho kuba umwe mu ikomeye muri iri rushanwa.
