Ikipe za Atalanta na Bologna zo mu Cyiciro cya Mbere mu Butaliyani zirifuza umukinnyi w'ikipe y'igihugu 'Amavubi', Hakim Sahabo.
Nk'uko ibinyamakuru byiganjemo ibyo mu Butaliyani, birimo Tuttormercato, byabyanditse, aya makipe yo mu Butaliyani amaze iminsi yohereza abashinzwe kuyagurira abakinnyi mu Bubiligi kugira ngo bakurikirane uko ari kwitwara mu ikipe ya Standard de Liège akinira.
Sahabo w'imyaka 20 amaze gukinira Amavubi imikino icyenda, aho aheruka guhamagarwa mu mikino yo Gushaka itike y'Igikombe cy'Isi cya 2026 Amavubi yahuyemo na Nigeria ndetse na Lesotho muri Werurwe.
Yatangiye gukinira umupira w'amaguru mu makipe y'abato ya Standard de Liège mbere yo kujya muri LOSC Lille yo mu Bufaransa.
Nyuma y'aho, yagarutse muri Standard de Liège yahise imutiza muri Beerschot VA kugira ngo abone umwanya uhagije wo gukina, mbere yo kumugarura muri uyu mwaka w'imikino, aho amaze kuyikinira imikino 15.
Uyu musore ukina mu kibuga hagati, afite agaciro k'asaga miliyari 11 Frw.
Si ubwa mbere Sahabo avuzwe mu makipe akomeye kuko no mu mwaka ushize yavuzwe muri Eintracht Frankfurt and TSG Hoffenheim zo mu Budage ndetse na Leicester City yo mu Bwongereza.
