Umuyobozi wa APR FC, Brig Gen Deo Rusanganwa, yeruye ko ubuyobozi bw’iyi kipe bugifitiye icyizere gikomeye umutoza Taleb Abderrahim, avuga ko ibyo ari gukora biri mu murongo mwiza kandi ko abamunenga cyane muri iki gihe hari aho "bigiza nkana" mu isesengura ryabo.
Mu kiganiro yagiranye na Isibo TV, Brig Gen Rusanganwa yasobanuye ko umutoza agikeneye igihe cyo kwigisha abakinnyi umukino ashaka gukina, asaba abafana kumwihanganira.
Yagize ati "Kugeza ubu umusaruro we nta kibazo kirimo kuko hari ibyo yerekana biri mu murongo mwiza. Ni bwo umutoza agitangira kwigisha umukino we ashaka."
Chairman wa APR FC yakomeje avuga ko impinduka umutoza azanye zikenera igihe kugira ngo abakinnyi bazumve neza. Yashimangiye ko iyo baganiriye, umutoza amwereka ibimenyetso bifatika birimo amashusho agaragaza amakosa yabayeho n’uko agomba gukosorwa, bityo ko atari umuntu udafite icyerekezo.
Yasoje asaba abakunzi ba APR FC kudacira urubanza uyu mutoza hutihuti, ahubwo ko bagomba kubanza kureba imiterere y’abakinnyi bilahari n’uburyo bari kwakira imyitozo mishya.
Yagize ati "Tubanze tumuhe umwanya turebe. Sinshaka kumuvugira ariko hari aho mwigiza nkana mu gusesengura kwanyu."
Kugeza ubu APR FC ni iya kane ku rutonde rwa Shampiyona, aho ifite amanota 14 mu mikino irindwi imaze gukina. Kuri uyu wa Gatanu saa Kumi n'Ebyiri kuri Kigali Pelé Stadium, irakina na AS Kigali mu mukino w'umunsi wa cyenda wa Shampiyona.
