Iyi kipe y'abarabu ibaye ikipe ya kabiri yo muri Afurika yegukanye igikombe cy'Isi mu bato, nyuma ya Ghana yabikoze mu 2009.

Yassir Zabiri ukina Famalicāo yo mu cyiciro cya mbere muri Portugal ni we watsinze ibi bitego byombi byatanze intsinzi. Yafunguye amazamu ku munota wa 12 mbere yo gushyiramo icy'umutekano ku wa 29.

Argentine itari yagatsindiwe ku mukino wa nyuma w'iri rushanwa mu myaka 42 ishize, yagerageje gukora iyo bwabaga mu gice cya kabiri ngo yishyure, gusa Abanya-Maroc babyitwaramo neza.

Albiceleste ibitse iki Gikombe cy'Isi cy'abato inshuro esheshatu, ni na yo yahabwaga amahirwe no kuri iyi nshuro, kuko yatsinze imikino itandatu yose bakinnye, binjiza ibitego 15 mu gihe batsinzwe bibiri gusa, n'ubwo batari bafite abakinnyi babo ngenderwaho, Claudio Echeverri wa Bayer Leverkusen ndetse na Franco Mastantuono wa Real Madrid. 

Maroc y'abakuru na yo iherutse gukatisha itike y'Igikombe cy'Isi cya 2026 kizabera muri Leta Zunze Ubumwe za Amerika, Canada na Mexique. Ubwo iri rushanwa riheruka kubera muri Qatar mu 2022, iyi kipe yambara umutuku n'icyatsi yakoze amateka yo kugera muri 1/2 bwa mbere ku ikipe yo muri Afurika, mbere yo gusezererwa n'Ubufaransa. 

Argentine ni yo yegukanye iki gikombe giheruka ndetse izaba iri no mu kizabera muri Amerika ya Ruguru umwaka utaha.