Uyu mukinnyi ukina asatira anyuze inyuma ya ba rutahizamu, yerekanwe kuri uyu wa Gatatu yambaye umwambaro w’iyi kipe uriho nimero 10, akaba yitezweho kuziba icyuho mu busatirizi bw’iyi kipe ifite akazi katoroshye imbere.
Muhadjiri winjiye muri iyi kipe nk’umukinnyi wigenga nyuma yo gutandukana na Police FC, afite inshingano nyamukuru yo gufasha Nairobi United kwitwara neza mu mikino y’amatsinda ya CAF Confederation Cup.
Kugeza ubu, iyi kipe ntabwo ihagaze neza kuri urwo rwego, kuko iri ku mwanya wa nyuma mu Itsinda B aho nta nota na rimwe irabona mu mikino ibiri imaze gukina.
Muri Shampiyona ya Kenya, Nairobi United iri ku mwanya wa cyenda n’amanota 19 mu mikino 11, ikaba irushwa amanota atandatu na Gor Mahia FC iyoboye urutonde.
Muri Nairobi United, Muhadjiri agiye gukinana na myugariro Buregeya Prince, usanzwe ari inkingi ya mwamba muri iyi kipe.
Aba bombi baraziranye cyane kuko bakinana mu Ikipe y’Igihugu ‘Amavubi’, ndetse bakaba barakinanye igihe kinini muri APR FC mbere yo gutandukana.
Muhadjiri yerekeje i Nairobi mu gitondo cyo ku wa Mbere w’icyumweru gishize, nyuma yo kumvikana n’ubuyobozi bw’iyi kipe.
Yari amaze amezi abiri adafite ikipe, dore ko yaherukaga gusesa amasezerano na Police FC ku bwumvikane tariki ya 10 Ukwakira 2025, nubwo yari yari yongereye umwaka umwe ku yo yari asanganywe mu Ikipe y’Abashinzwe umutekano.
