Uyu musaruro utumye Police FC igumana agahigo ko kuba imaze imikino 10 idatsindwa muri uyu mwaka w’imikino, ikaba iyoboye urutonde n’amanota 22, aho irusha amanota ane Gasogi United iyikurikiye. Ku rundi ruhande, inota rimwe Musanze FC yakuye i Kigali ryayifashije kuguma ku mwanya wa gatatu n’amanota 16.
Byiringiro Lague ni we wafunguye amazamu ku munota wa 27, ku ishoti rikomeye yateye amaze gucenga ava hagati mu kibuga. Iki gitego Police FC yakirinze iminota myinshi, ariko kiza kwishyurwa ku munota wa 90 na Hakizimana Thity, wafashije iyi kipe yo mu Majyaruguru gukura inota rimwe i Kigali.
Mbere y’uko Musanze FC yishyura, umukino wajemo impaka zikomeye cyane cyane ku munota wa 80, ubwo Hakizimana Thity yasaga n’utezwe mu rubuga rw’amahina na Ndayishimiye Dieudonné ‘Nzotanga’. Abakinnyi ba Musanze basagaba penaliti, ariko umusifuzi Umutoni Aline yemeza ko nta kosa ryabaye, ibintu byatumye umwuka uba mubi mu kibuga mbere y’uko haboneka igitego cyo kwishyura.
Uretse ibitego, amakipe yombi yahushije uburyo bukomeye bashoboraga guhindura umukino.
Mu yindi mikino yabaye kuri uyu munsi wa cyenda, Marine FC yihereranye Bugesera FC i Rubavu iyitsinda ibitego 2-0. Kuri ubu urutonde rwa shampiyona ruragaragaza guhatana gukomeye, aho APR FC ifite amanota 15 inganya na Marine FC, naho Rayon Sports ikaza inyuma yazo n’amanota 14.
Shampiyona izakomeza mu mpera z’icyumweru gitaha hakinwa umunsi wa 10 uzaba ukomeye cyane. Police FC izaba ifite akazi katoroshye ko kwisobanura na APR FC ku wa Gatandatu tariki ya 6 Ukuboza 2025, mu gihe Musanze FC izakira Rayon Sports ku wa Gatanu.
