Impuzamashyirahamwe y'Umupira w'Amaguru muri Africa (CAF), yemeje ko ikipe ya Ethiopian Insurance izakirira Pyramids FC kuri Kigali Pelé Stadium mu mukino wa mbere w'ijonjora rya kabiri ryo gushaka itike yo gukina amatsinda ya CAF Champions League. 

Uyu mukino uzakinwa ku wa Mbere, tariki 27 Ukwakira 2025, saa Kumi z'igicamunsi. 

Mu ijonjora rya mbere ry'iri rushanwa, Entiopian Insurance yakiriye umukino batsinzemo Mlandege FC yo muri Zanzibar mu rugo, kuri Abebe Bikila Stadium. 

Icyakora nyuma yaho, CAF yoherejeyo itsinda ryayo ryongeye gusuzuma neza iyi stade, maze ryemeza ko ifite ibibazo mu kibuga ndetse no mu miyoboro yayo y'amazi; ibyatumye ihita iyihagarika.

Mu ntangiriro z'uku kwezi kandi nabwo, ikipe y'Igihugu ya Ethiopia yakiniye mu Rwanda mu mukino wo ku munsi wa cyenda wo mu itsinda A ryo gushaka itike y’Igikombe cy’Isi cya 2026 kizabera muri Leta Zunze Ubumwe za Amerika, Canada na Mexique. Uyu mukino wabereye kuri Stade Amahoro, warangiye Ethiopia itsinze Guinée-Bissau igitego 1-0.

Pyramids FC ibitse igikombe cya CAF Champions League giheruka, iheruka gukinira kuri Kigali Pelé Stadium tariki ya 1 Ukwakira, ubwo yatsindaga APR FC ibitego 2-0, inayisezerera muri iyi mikino ku giteranyo cy'ibitego 5-0.