Ubuyobozi bwa Rayon Sports FC bwatangaje ko bwahagaritse mu nshingano Umutoza Mukuru, Afhamia Lotfi hamwe n’Umutoza Wungirije wa Kabiri, Azzouz Lotfi mu gihe kitatangajwe.

Itangazo ryasohowe kuri uyu wa Mbere tariki ya 13 Ukwakira 2025, rivuga ko Umutoza Wungirije wa Mbere, Umurundi, Haruna Ferouz, ari we usigarana ikipe by'agateganyo 

Banditse bati “Ubuyobozi bwa Rayon Sports bwafashe icyemezo cyo guhagarika mu nshingano Umutoza Mukuru, Afhamia Lotfi n’Umutoza Wungirije wa Kabiri, Azzouz Lotfi. Umutoza wungirije Haruna Ferouz n’abandi bakorana (staff technique) barakomeza inshingano zo gutegura imikino iri imbere.”

Iki cyemezo kije nyuma yuko ikipe imaze imikino ine idatsinda. Muri iyo mikino harimo ibiri yo muri CAF Confederation Cup batsinzwemo na Singida Big Stars (1-0 & 2-1), uwo batsinzwemo na Police FC igitego 1-0 ndetse n'uwo Rayon Sports iheruka kunganyamo na Gasogi United ibitego 2-2 muri Shampiyona. Uyu musaruro mubi uri mu byo aba batoza bazize. 

Uretse n'ibyo kandi, hashize igihe hatutumba umwuka mubi hagati y'ubuyobozi, abafana ndetse n'umutoza, aho bashinja uyu Munya-Tunisie gukina umukino udashamaje kandi udatanga icyizere cy'umusaruro w'ejo hazaza. 

Kuri ubu iyi kipe yambara ubururu n'umweru ni iya karindwi ku rutonde rwa Shampiyona, aho ifite amanota ane gusa mu mikino itatu. 

Ku munsi wa kane wa Shampiyona, iyi kipe ikomoka i Nyanza izakira Rutsiro FC tariki 18 Ukwakira, kuri Kigali Pelé Stadium saa Kumi n'Ebyiri n'igice. 

Afhamia Lotfi yagizwe umutoza wa Rayon Sports mu mpera za Gicurasi, ahabwa amasezerano y’umwaka umwe.