Rayon Sports ikomeje ibihe bibi muri Shampiyona, yongeye gutakaza amanota nyuma yo kunganya na Gicumbi FC igitego 1-1 mu mukino w'Umunsi wa Cyenda wabereye kuri Kigali Pelé Stadium kuri uyu wa Gatandatu.

Uyu ubaye umukino wa gatatu wikurikiranya Gikundiro idatsinda, ibintu bikomeje gushyira igitutu ku buyobozi bushya ndetse n'umutoza w'agateganyo, Haruna Ferouz. Kunganya kuri uyu munsi byatumye Rayon Sports igira amanota 14 iguma ku mwanya wa gatanu, mu gihe Gicumbi FC yagize amanota icyenda ijya ku mwanya wa 12.

Gicumbi FC ni yo yabanje gufungura amazamu ku munota wa 61, binyuze ku ishoti rikomeye rya Rubuguza Jean Pierre ryatsindiwe mu rubuga rw'amahina, umunyezamu Mugisha Yves ntiyamenya uko bigenze.

Rayon Sports yirukaga inyuma y'ibitego yaje kwishyura habura iminota itandatu gusa ngo umukino urangire, ubwo Ndikumana Asman yateraga umupira mu izamu n'umutwe ku mupira wari uhinduwe na Tony Kitoga. Nubwo abakinnyi ba Gicumbi FC bagaragaje ko habayeho kurarira, byarangiye igitego cyemejwe.

Rayon Sports yagaragaje intege nke mu gice cya mbere, aho yarushijwe cyane na Gicumbi FC yaremaga uburyo bwinshi imbere y'izamu rya Mugisha Yves. Abakinnyi nka Sindi Paul Jesus na Adama Bagayogo bagerageje gushaka uburyo bw'ibitego ariko ubwugarizi bwa Gicumbi bukababera ibamba.

Mu gice cya kabiri, umutoza Haruna Ferouz yakoze impinduka, yinjiza Habimana Yves na Ndikumana Asman, ari na we waje gutabara Gikundiro.

Ndayishimiye Richard wa Rayon Sports ni we watowe nk'umukinnyi mwiza w'umukino (Man of the Match), ahabwa sheki y'ibihumbi 100 Frw.

Mu yindi mikino yabaye kuri uyu wa Gatandatu, Amagaju FC yatsinzwe na Gasogi United igitego 1-0 i Huye, naho Rutsiro FC itsindwa na AS Muhanga igitego 1-0 i Rubavu.