Myugariro w’ibumoso wubatse izina rikomeye mu Rwanda, Rutanga Eric, yatangaje ko asezeye burundu ku gukina umupira w’amaguru nk’uwabigize umwuga ku myaka 34 y’amavuko.
Uyu mukinnyi wakanyujijeho mu makipe y’ibihangange nka APR FC na Rayon Sports, yashyize akadomo ku rugendo rwe rwa ruhago ku mugoroba wo kuri uyu wa Gatatu, tariki ya 7 Mutarama 2026, abinyujije mu butumwa yashyize ku mbuga nkoranyambaga ze.
Mu butumwa bwe bwuzuye amarangamutima, Rutanga yashimiye umupira w’amaguru avuga ko wamuhaye byose, arerwa na wo, umwigisha guhangana no gukura mu buzima.
Yagize ati “Warakoze umupira w’amaguru. Wampaye intego, imyitwarire, amasomo n’ibihe bitazibagirana. Warandeze, unyigisha guhangana, kwizera no gukura mu buzima.”
Yasoje agira ati “Urugendo rwanjye rwo gukina umupira nk’uwabigize umwuga ni aha rurangiriye.”
Rutanga yafashe umwanya wo gushimira amakipe yose yanyuzemo, abatoza, abakinnyi bagenzi be n’abafana bamweretse urukundo mu myaka irenga 15 amaze mu kibuga.
Yavuze ko umupira w’amaguru utari umukino gusa kuri we, ahubwo wari umuryango n’ubuzima bwe bwose.
Ati “Ndashimira amakipe yose, abatoza, abakinnyi twakinanye, abayobozi n’abafana bose bangiriye icyizere kandi bakanyitaho mu rugendo rwanjye. Urukundo n’inkunga mwampaye bizahora mu mutima wanjye.”
Rutanga Eric azahora yibukwa nk’umwe muri ba myugariro beza b’ibumoso u Rwanda rwagize, akaba n’inzobere mu gutera imipira y’imiterekano (Coup Francs).
Igitego cya ‘Coup franc’ yatsinze Gor Mahia yo muri Kenya mu 2018 ubwo Rayon Sports yari mu matsinda ya CAF Confederation Cup, ni kimwe mu bihe bitazibagirana yasigiye abakunzi ba ruhago.
Uyu mugabo yatangiye kumenyekana cyane mu 2011 ubwo yatoranywaga mu Ikipe y’Igihugu y’abatarengeje imyaka 17 yakinnye Igikombe cy’Isi muri Mexique.
Yazamukiye muri APR FC ayikinira imyaka itari mike mbere yo kwerekeza muri mukeba Rayon Sports mu mwaka w’imikino wa 2017-2018, aho yanafashije iyi kipe kugera muri ¼ cya CAF Confederation Cup.
Nyuma yo kuva muri Rayon Sports, yakiniye Police FC, ayivamo mu 2024 yerekeza muri Gorilla FC yakiniye umwaka umwe kugeza mu mpeshyi y’umwaka ushize.
Rutanga asezeye afite ibikombe byinshi birimo bitanu bya Shampiyona, bitatu by’Amahoro na bibiri bya Super Cup, akaba yaranakiniye Ikipe y’Igihugu ‘Amavubi’ mu bihe bitandukanye.
