Ikipe y'u Rwanda y'abahungu yisanze mu Itsinda B naho iy'abakobwa yisanga mu Itsinda A mu mikino ya Shampiyona Nyafurika y'Amashuri mu gice cya CECAFA (U15 CAF African Schools Football Championship CECAFA Qualifiers), izabera muri Uganda tariki 6-9 Ugushyingo 2025.

Iyi tombola yabaye ku wa Gatatu tariki 10 Ugushyingo, muri studio za televiziyo y'Ishyirahamwe rya Ruhago muri Uganda (FUFA) iherereye Mengo mu Mujyi wa Kampala.

Mu itsinda B, abahungu b'i Cyarwa bazesurana n'amashuri yo muri Tanzania, Somalia, Èthiopie na Sudan. Ni mu gihe abakobwa bazahatana n'amashuri yo muri Uganda, Kenya n'uburundi.

Amakipe azahagararura u Rwanda ni GS Cyarwa yo mu Karere ka Huye yatwaye igikombe ku rwego rw'igihugu mu bahungu nyuma yo gutsinda GS Busigari yo mu Karere ka Rubavu ibitego 2-0 ku mukino wa nyuma ndetse na APE Rugunga yo mu Karere ka Nyarugenge yegukanye igikombe itsinze CFG Rwamagana penaliti 3-2 nyuma yo kunganya ubusa ku busa. 

Ni imikino ya nyuma yabereye mu Karere ka Rubavu, ku Cyumweru, tariki ya 9 Ukuboza 2025.

Iri rushanwa rizabera muri Uganda, ku ikubitiro ryagombaga kubera muri Éthiopie mbere y'uko iki gihugu kivuga ko kititeguye neza, Uganda ikemera kwakira iri rushanwa rizahatanamo amakipe 10 mu ngimbi ndetse n'umunani mu cyiciro cy'abangavu.

Kuva Shampiyona Nyafurika y'Amashuri yatangizwa na Perezida w'Impuzamashyirahamwe  y'Umupira w'Amaguru muri Afurika (CAF), Dr. Patrice Motsepe, mu 2022, amakipe yo muri CECAFA ari mu yakunze kwitwara neza. 

Ubwo ryakinwaga bwa mbere i Durban muri Afurika y'Epfo mu 2023, CS Ben Sekou Sylla yo muri Guinée ni yo yatwaye igikombe mu bahungu, mu gihe Fountain Gate School yo muri Tanzania ari yo yatwaye icy'abakobwa. 

Mu mwaka wa kabiri w'iri rushanwa ryabereye mu Birwa bya Zanzibar mu 2024, ishuri ryo muri Tanzania ni ryo ryahize ayandi mu bahungu, iryo muri Afurika y'Epfo ritwara igikombe mu bakobwa.

Muri uyu mwaka, ubwo iri rushanwa ryakinwaga ku nshuro ya gatatu muri Ghana, Tanzania yisubije igikombe mu ngimbi mu gihe abangavu bo muri Ghana yari mu rugo, batsindiye ku mukino wa nyuma ishuri ryo muri Uganda.