Ibi Bisengimana yabitangaje nyuma y'imyitozo ya nyuma ibanziriza uyu mukino w'umunsi wa cyenda wa Shampiyona, uteganyijwe kuri uyu wa Gatandatu saa Cyenda kuri Kigali Pelé Stadium.
Yagize ati "Icyo nababwira cyo, muzabona umukino wo gusatira. Nta bintu byo kugarira ngo ni uko tugiye gukina na Rayon Sports. Oya. Twebwe tuzakina umukino wacu, niba ari twe tuzatsinda, Imana izaba yabishatse; niba ari Rayon Sports izatsinda, ubwo nabwo ni ko izaba yabipanze. Nta gahunda dufite yo gutinya Rayon Sports ngo dukinire inyuma."
Uyu mutoza wageze muri Gicumbi FC mbere gato y'uko uyu mwaka w'imikino utangira, avuye kungiriza Mashami Vincent muri Police FC, yasezeranyije abazaza kureba umukino ko batazicuza.
Ati "Ni umukino uzaba ari mwiza ku bantu bazaza kuwureba. Rayon Sports ni ikipe nkuru, ikina umukino mwiza, kandi natwe ni byo tugerageza gukora. Dukeneye amanota na Rayon Sports ikeneye amanota; twese twatakaje imikino iheruka."
Gicumbi FC igiye kwakira uyu mukino imaze imikino ibiri yikurikiranya itsindwa; yatsinzwe na Musanze FC 3-2 ndetse na Police FC ibitego 2-1. Mbere yaho gato yari yanganyije na Etincelles FC igitego 1-1, aho magingo aya iri ku mwanya wa 12 n'amanota umunani.
Rayon Sports y'Umutoza w'Agateganyo, Haruna Ferouz, na yo yatsinzwe na APR FC ibitego 3-0 ndetse na AS Kigali 2-0 mu mikino iheruka. Magingo aya iri ku mwanya wa gatanu n'amanota 13 ku rutonde rwa Shampiyona ruyobowe na Police FC ifite amanota 21.
