Bitewe n'intambara iri kubera muri Sudani, Shampiyona yo muri icyo gihugu yarahagaze kuva mu 2023.
Ku ikubitiro Al Hilal Omdurman na Al Ahli SC Wad Madani ni zo zari zasabye gukina Shampiyona y'u Rwanda ndetse bikavugwa ko hari hamaze no gutegurwa ingengabihe ivuguruye, irimo n'aya makipe.
Umunyamabanga Mukuru w’Agateganyo akaba na Visi Perezida wa Kabiri ushinzwe Tekinike muri FERWAFA, Mugisha Richard, yabwiye IGIHE dukesha iyi nkuru, ko bamaze kwakira n'ubusabe bwa Al-Merrikh.
Ati "Al-Merrikh yarabisabye ni ko kuri. Batwandikiye ejo mu buryo bwemewe. Ibiganiro biri kubaho ni ukureba na Rwanda Premier League y’uko byagenda kuko basanze Shampiyona yaratangiye.”
Bivugwa ko Al-Merrikh niramuka yemerewe, izahita ijya kuba mu Karere ka Rubavu, akaba ari ho izajya yakirira imikino yayo, mu gihe Al Hilal yo yazajya yakirira muri Stade Amahoro.
Aya makipe yombi aramutse yemerewe gukina Shampiyona, byaba bivuze ko Rwanda Premier League y'uyu mwaka yakinwa n'amakipe y'igiharwe (19), ku buryo byajya bisaba ko kuri buri munsi wa Shampiyona hagira ikipe isibira.
Kuri ubu Shampiyona imaze gukinwa iminsi ine, aho umunsi wa gatanu uzakinwa mu mpera z'icyumweru. Police FC y'umutoza Ben Mussa ni yo iyoboye urutonde n'amanota 12, mu gihe Rutsiro FC ya nyuma ari yo kipe itarabona inota na rimwe magingo aya.
Leave a Comment