‎Ikipe y'Igihugu ya Espagne yegukanye Igikombe cy'Isi cya 2026 nyuma yo gutsinda Argentine igitego 1-0 mu minota y'inyongera. Iki gitego rukumbi cyatsinzwe na Ferran Torres ku munota wa 106, wahesheje igihugu cye igikombe cya kabiri mu mateka yacyo.
‎
‎Uyu mukino wa nyuma wabereye muri Leta Zunze Ubumwe za Amerika waranzwe n'ishyaka ndetse no kugarira cyane ku ruhande rwa Argentine yakoraga amakosa menshi.
‎
Ibi byatumye iyi kipe yo ku mugabane wa Amerika y'Epfo isigara ifite abakinnyi 10 mu kibuga nyuma y'uko Enzo Fernandez ahawe ikarita ya kabiri y'umuhondo ikabyara itukura mu minota y'inyongera y'igihe gisanzwe, azize gukorera ikosa myugariro Pau Cubarsi.
‎
‎Espagne yari hejuru cyane mu kibuga kuko yihariye umupira ku kigero cya 65%, inatera amashoti 20 arimo 11 yaganaga mu izamu.
‎
Ku rundi ruhande, umunyezamu wa Argentine, Emiliano Martinez, yakoze akazi gakomeye akuramo amashoti 11, gusa ntiyabasha kurokora ikipe ye yanditse amateka mabi yo gukina iminota 90 y'umukino wa nyuma idateye ishoti na rimwe.
‎
‎Uku kwegukana igikombe kwasize umusore Lamine Yamal w'imyaka 19 abaye umukinnyi wa gatatu muto ukoze aya mateka mu gukina umukino wa nyuma no kuwegukana nyuma ya Pele na Giuseppe Bergomi.
‎
Umukino urangiye habaye imvururu zatejwe n'abakinnyi ba Argentine barimo Leandro Paredes na Nahuel Molina bagaragaje imyitwarire mibi bashyamirana n'aba Espagne.
‎
‎Uyu mukino wari witabiriwe na Perezida Donald Trump waranzwe n'akaruhuko k'igice cya mbere kadasanzwe kamaze iminota 27 gasusurutswa n'abahanzi barimo Shakira, Madonna na Justin Bieber.