Ikipe ya Rayon Sports yashyize iherezo ku gihombo yari imazemo imyaka itandatu, yegukana igikombe cy'Umunsi w'Igikundiro nyuma yo gutsinda Gor Mahia ibitego 2-0.
‎
Iyi ntsinzi yagaruye ibyishimo mu bafana ba Gikundiro bari bamaze igihe kinini batazi uko gutsinda kuri uyu munsi w'amateka bimera kuko baherukaga ibyishimo nk'ibi mu 2019.
‎
‎Uyu mukino wari ishingiro ry'ibirori bya Rayon Day 2026 wabereye kuri Kigali Pelé Stadium, wagaragayemo ishyaka ku mpande zombi.
‎
Iyi kipe yambara ubururu n'umweru yafunguye amazamu mu minota y'inyongera y'igice cya mbere binyuze kuri rutahizamu Atisso Kodjo wabyajije umusaruro amakosa yari akozwe n'umunyezamu wa Gor Mahia.
‎
‎Gikundiro yongeye gushimisha abafana bayo habura iminota mike ngo umukino urangire, ubwo rutahizamu mushya Herman Junior Kameni yahaga umupira mwiza Ndikumana Fabio agahita atsinda igitego cya kabiri.
‎
Abakinnyi bashya barimo myugariro Charles Tchouplaou na Issa Djiguiba bagaragaje urwego rwo hejuru rutanga icyizere cy'ikipe ikomeye mbere yo gutangira irushanwa rya CECAFA Kagame Cup.
‎
‎Mbere y'uyu mukino nyamukuru habaye ibirori bitandukanye birimo umukino wahuje abakanyujijeho muri Rayon Sports n'ikipe ya Inyange warangiye amakipe yombi anganyije ibitego 3-3.
‎
Abafana bari bitabiriye ku bwinshi basusurukijwe n'abahanzi barimo Kitoko na Bull Dogg ndetse na Chorale de Kigali mbere y'uko ubuyobozi bwerekana abakinnyi 27 n'abatoza bashya bayobowe na Haringingo Francis Christian.
‎
‎Murera igiye gukomeza imyitozo yitegura CECAFA Kagame Cup izaba mu mpera z'uku kwezi.