Mu mpera za Nzeli nibwo hamenyekanye amakuru ko Gaston ari mu biganiro bya nyuma n’ikipe ya Tigers BBC gusa byaje kurangira bananiranwe cyane ko batumvikanaga ku kuba uyu mugabo yazasiga ikipe ye akaba yajya mu kiraka mu mikino ya basketball Africa league.

APR BBC yaje kumenya ayo makuru iyasamira hejuru ihita itangira ibiganiro n’uyu mugabo, bitagoranye yaje kumvikana nayo cyane ko iyi kipe y’ingabo z’igihugu izakina imikino ya Basketball Africa League. Gaston azajya ahembwa asaga miliyoni umunani n’ibihumbi magana atanu y’amafaranga y’u Rwanda ku kwezi.

Ndizeye yatangiriye urugendo rwa Basketball nk’uwabigize umwuga mu ikipe ya IPRC kigali mu 2015 mbere yo kwerekeza muri Patriots BBC mu 2017 aho yatwayemo shampiyona aza no kuba umukinnyi mwiza mu 2019 ndetse azwiho gutsinda amanota atatu cyane.

Mu mpera za 2024 yari kumwe na Kriol Star yo muri Cape Verde mu mikino ya Road to BAL 2025 yabereye muri Libya na Kenya. Kuri ubu yakiniraga ikipe ya MAS Fes yo mu gihugu cya Maroc aho yari yarasinye amasezerano y’igihe gito.

Ntabwo ari aha APR BBC ifungira isoko kuko iri mu biganiro n’abakinnyi batandukanye kuko irifuza kuzagera byibura ku mukino wa nyuma wa Basketball Africa League dore ko yatahanye umwanya wa 3 ubwo iheruka muri iri rushanwa.