‎Ikipe ya Arsenal yashimangiye urugendo rwayo rwo gushaka igikombe cya Shampiyona y'u Bwongereza (Premier League), inyagira mukeba wayo Tottenham Hotspur ibitego 4-1 mu mukino wa 'Derby ya North London' wabaye kuri iki Cyumweru.
‎
‎Uyu mukino waranzwe n'ubuhanga budasanzwe bwa ba rutahizamu Eberechi Eze na Viktor Gyokeres, aho buri wese yatsinzemo ibitego bibiri.
‎
‎Iyi ntsinzi ya gatanu yikurikiranya Arsenal ibonye imbere ya Tottenham, yafashije umutoza Mikel Arteta gushyiramo intera y'amanota atanu hagati ye na Manchester City bahataniye igikombe, nubwo City ifite umukino w'ikirarane.
‎
‎Kuri Tottenham Hotspur, uyu mukino wasize icyizere ari gike nyuma y'uko umutoza mushya w'agateganyo, Umunya-Croatia Igor Tudor wasimbuye Thomas Frank wirukanywe, atangiye nabi.
‎
‎Tudor asigaranye akazi katoroshye ko kuvana iyi kipe ku mwanya wa 16, aho irusha amanota ane gusa amakipe ari mu murongo utukura w'ashobora kumanuka mu cyiciro cya kabiri.
‎
‎Umukino watangiye ukerereweho iminota itandatu kubera ibibazo by'itumanaho ku basifuzi, ariko Arsenal yatangiye isatira cyane.
‎
‎Ikipe ya Arteta yabonye igitego cya mbere ku munota wa 32 gitsinzwe na Eberechi Eze ku mupira mwiza yari ahawe na Bukayo Saka wari wazonze ba myugariro ba Tottenham.
‎
‎Ibyishimo by'aba-Gunners ntibyamaze kabiri, kuko nyuma y'amasegonda 24 gusa umukino usubukuwe, umukinnyi wo hagati Declan Rice yatakarije umupira inyuma abangamiwe n'abakinnyi babiri.
‎
‎Randal Kolo Muani yahise amwambura uyu mupira yishyurira Tottenham, kikaba ari cyo gitego cya mbere atsinze muri Premier League kuva yatizwa avuye muri Paris Saint-Germain.
‎
‎Mu gice cya kabiri, Arsenal yagarukanye imbaraga zidasanzwe, bituma Viktor Gyokeres atsinda igitego cya kabiri ku munota wa 47 arekuriye ishoti inyuma y'urubuga rw'amahina.
‎
‎Tottenham yagerageje kwishyura ndetse Kolo Muani ashyira undi mupira mu nshundura ku munota wa 53, ariko umusifuzi yemeza ko yabanje gusunika myugariro Gabriel.
‎
‎Ibi byahaye Arsenal imbaraga zo gukomeza gusatira, Eberechi Eze atsinda igitego cya gatatu ku munota wa 61 nyuma yo guhererekanya neza na Gyokeres, ashimangira ko ari umukinnyi ukunda kuzonga Tottenham cyane kuko yayitsinze ibitego umunani mu mikino itanu aheruka kuyikinamo.
‎
‎Mu minota y'inyongera (94'), Viktor Gyokeres yashyizemo agashinguracumu, atsinda igitego cya kane nyuma yo gucenga umunyezamu Guglielmo Vicario, ashimangira intsinzi y'ikipe ye gusa Bukayo Saka aza kuvamo avunitse mu minota ya nyuma.
‎
‎Umutoza wa Arsenal, Mikel Arteta, yashimiye abakinnyi be uburyo bitwaye nyuma yo kunganya na Wolverhampton Wanderers 2-2 mu mukino uheruka, avuga ko bagaragaje ubushake n'ishyaka ridasanzwe.
‎
‎Arteta yagize ati "Nabonye uko bitwaye n'icyo bivuze. Iyo ari akazi gusa ntabwo witwara gutya, ariko iyo ari ibintu ufitiye ishyaka kandi ukunda umukino cyane, biba ari ikindi kintu kandi bikubabaza mu buryo butandukanye."
‎
‎Uyu mutoza yanashimiye Gyokeres watsinze ibitego bibiri, avuga ko imikinire ye muri rusange muri uyu mukino yari "agatangaza".
‎
‎Ku rundi ruhande, umutoza Igor Tudor wa Tottenham yemeye ko Arsenal yabarushije cyane, asaba abakinnyi be gukora cyane kuko hari icyuho kinini hagati y'amakipe yombi.
‎
‎Tudor yabwiye itangazamakuru ati "Inzira yonyine ni ugukora, tugatuza, tukiyoroshya, tukaguma aho turi ubu tukareba imbere. Ndababaye kuko ntabwo byari byiza bihagije. Arsenal yari nziza cyane. Hari icyuho kinini cyane hagati y'amakipe yombi."
‎
‎Iyi kipe y'i Londres izongera kumanuka mu kibuga ku Cyumweru, tariki ya 1 Werurwe, aho Arsenal izakira Chelsea kuri Emirates Stadium saa 16:30, mu gihe Tottenham yabuze intsinzi muri uyu mwaka wa 2026 izerekeza kuri Craven Cottage gukina na Fulham saa 14:00.