Uyu mukino wari utegerezanyijwe amatsiko na benshi mu bakunzi ba ruhago, bitewe n'uko Gasogi United yari imaze gutsinda ibitego byinshi (9) kurusha izindi kipe, yahuraga na Kiyovu Sports yari imaze kwinjizwa bike (2) kurenza izindi.
Umukino watangiye mu mvura nyinshi, amakipe yombi arema uburyo bw'ibitego. Gasogi United ni yo yabonye uburyo bwa mbere, icyakora umunyezamu James Desire uherutse guhembwa nk'umunyezamu w'ukwezi k'Ukwakira, akarinda neza izamu rye.
Kiyovu Sports na yo yanyuzagamo igasatira Gasogi United, yaje kubona uburyo bwiza ku munota wa 35, ubwo Cedric Hamiss yazamukanaga umupira neza, awuha rutahizamu Moise Sandja Bulanga wananiwe kuwushyira mu nshundura.
Sandja yongeye kubona undi mupira mwiza washoboraga kubyara igitego, awuteye n'umutwe ukubita igiti cy'izamu ugarukira Niyo David utabashije kuwusongamo.
Gaso United yaje guhita ihindura umukino, maze mu minota y'inyongera ifungura amazamu binyuze ku Umugande, Kazibwe Faizo watsinze igitego ahawe umupira n'Umurundi Ndikumana Danny.
Amakipe yagiye kuruhuka iminota 15 Urubambyingwe ari rwo ruri imbere.
Mu gice cya kabiri, Umutoza Haringingo Francis yagerageje uburyo bwinshi bwo gushaka kugombora, akuramo abarimo Nsanzimfura Keddy, Amiss Cédric, Moise Sandja Bulanga na Chérif Bayo, yinjizamo Mugisha Rama Joseph baheruka kugura, Uwineza Jean Rène, Gabriel Fils Meye na Fidali Uwiyaremye.
Izi mpinduka zari zigamije kongera imbaraga mu busatirizi ntizageze ku ntego zayo.
Habura iminota irindwi ngo umukino ugere ku musozo, Gabriel wagiyemo asimbuye yabonye uburyo bukomeye bw'igitego ku mupira mwiza yahawe na Uwineza Rene, ariko ananirwa kubushyira mu izamu.
Gasogi United y'umutoza Dusange Sasha yarinze neza izamu ryayo, maze umusifuzi Uwikunda Samuel ahuha mu ifirimbi bwa nyuma itsinze Urucaca igitego 1-0.
Kuva Gasogi United yabaho ntiratsindwa na Kiyovu Sports muri Shampiyona. Igikomeye Kiyovu Sports ikora iyo bahuye ni ukunganya.
Kuri ubu Gasogi yahise ifata umwanya wa kabiri n'amanota 15, aho irushwa abiri na Police FC ya mbere, mu gihe Kiyovu Sports yo ari iya karindwi n'amanota 10.
Imikino y’Umunsi wa Munani wa Shampiyona izakomeza ku wa Gatandatu aho Musanze FC izakira APR FC, Police FC yakire Gicumbi FC, Bugesera FC izakina na Rutsiro FC.
Amagaju FC izakira Etincelles FC, mu gihe Marine FC izakina na Gorilla FC. Imikino yose iteganyijwe Saa Cyenda.
Ku Cyumweru, tariki ya 23 Ugushyingo 2025, Rayon Sports izakira AS Kigali, mu gihe Mukura izakira na AS Muhanga.
Leave a Comment