‎Ikipe y’Abasirikare barinda Abayobozi Bakuru b’Igihugu (Republican Guard/RG) yegukanye Igikombe cy’Irushanwa rihuza imitwe y’Ingabo z’u Rwanda, nyuma yo gutsinda Ikipe y’Abasirikare bo mu Mutwe Udasanzwe (Special Operation Forces/SOF) igitego 1-0 ku mukino wa nyuma.

‎

‎Uyu mukino w’ishiraniro wabereye kuri Kigali Pelé Stadium kuri uyu wa Gatandatu, tariki ya 31 Mutarama 2026, witabiriwe n’abayobozi bakuru mu nzego za Gisirikare n’iz’Igihugu, barimo Minisitiri w’Ingabo, Juvénal Marizamunda n’Umugaba Mukuru w’Ingabo z’u Rwanda, Gen Mubarakh Muganga, ari na we wawutangije ku mugaragaro ari kumwe n’Umunyamabanga wa Leta muri Minisiteri ya Siporo, Rwego Ngarambe.

‎

‎Iyi mikino yari imaze igihe ibera hirya no hino mu gihugu, yateguwe mu rwego rwo kwizihiza Umunsi w’Intwari z’Igihugu wizihizwa buri tariki ya 1 Gashyantare.

‎

‎Umukino watangiye amakipe yombi akina yigana, umupira ukinirwa cyane mu kibuga hagati, ariko RG igaragaza inyota yo gushaka igitego binyuze kuri ba rutahizamu bayo barimo Shema Maike.

‎

‎Ku munota wa 40, ni bwo habonetse igitego kimwe rukumbi cyaranze uyu mukino. 

‎

‎Byaturutse ku ikosa myugariro wa SOF, Mutsinzi Daniel, yakoreye Sibomana Olivier. Nubwo umusifuzi wo hagati, Ngabonziza Jean Paul, yari yatanze ‘Coup-franc’, uwo ku ruhande yemeje ko ikosa ryabereye mu rubuga rw’amahina, maze hemezwa penaliti.

‎

Kapiteni wa Republican Guard, Ndagijimana Pierre, yateye neza iyi penaliti, umupira uruhukira mu nshundura, igice cya mbere kirangira RG iyoboye n’igitego 1-0.

‎

Mu gice cya kabiri, Special Operation Forces yagarutse ifite imbaraga nyinshi, isatira izamu rya RG ishaka kwishyura.

‎

 Abakinnyi nka Isimbi Sano na Niyobuhungiro Blaise bagerageje uburyo butandukanye ariko umunyezamu wa RG, Mugabo Eric, ababera ibamba.

‎

Mu minota ya nyuma, SOF yashyize igitutu gikomeye ku izamu rya RG, ariko ubwugarizi bukomeza guhagarara bwemye. 

‎

Umukino warangiye Republican Guard yegukanye igikombe ku ntsinzi y’igitego 1-0.

‎

Abakinnyi ba RG bishimiye bikomeye iyi ntsinzi, bashyigikiwe n’abarimo Capt Ian Kagame usanzwe ukinira iyi kipe ariko utagaragaye muri uyu mukino, hamwe n’umuhanzi Mariya Yohana wasusurukije abafana.

‎

Uretse umupira w’amaguru mu bagabo, habaye guhatana gukomeye mu yindi mikino. Mu mupira w'amaguru mu cyiciro cy'abagore, ikipe ya Military Police Brigade (MP) yegukanye igikombe nyuma yo gutsinda Rwanda Air Force (RAF) ibitego 3-2 mu mukino wari urimo ishyaka ryinshi. 

‎

Muri Volleyball, Republican Guard (RG) yashimangiye ubuhangange bwayo muri uyu mukino, yegukana igikombe itsinze Task Force DIV amaseti 3-1.

‎

Mu mukino w'intoki wa Basketball, Ishuri Rikuru rya Gisirikare rya Gako (RMA Gako) ryatwaye igikombe ritsinze SOF amanota 76-73 mu mukino wari ufunganye cyane.

‎

 Muri Handball, SOF ni yo yaje ku mwanya wa mbere, mu gihe muri Netball, Military Police (MP) ari yo yahize izindi.

‎

 Mu marushanwa yo kumasha mu makipe, BMTC Nasho ni yo yabaye iya mbere.

‎

Mu mikino ngororamubiri, hagaragayemo impano zitandukanye aho mu kwiruka metero 100 mu bagabo, Pte Asifiwe Geofrey ari we wabaye uwa mbere, naho mu bagore aba Officer Cadet Umuhoza Martine. 

‎

Mu ntera ndende ya metero 5000, Sgt Tuyishime Christophe yahize abandi mu bagabo, mu gihe Officer Cadet Nikuze Sandrine yabaye uwa mbere mu bagore.