Rutahizamu wa Real Madrid akaba na kapiteni w'Ikipe y'Igihugu y'u Bufaransa Kylian Mbappe ashobora gusiba umukino wa El Clasico uzabahuza na Barcelona mu kwezi gutaha kubera imvune ya hamstring.
Uyu mukinnyi w'igihangange yasimbuwe ku munota wa 81 mu mukino wa Shampiyona ya Espagne izwi nka La Liga ikipe ye yanganyijemo na Real Betis igitego 1-1 ku wa Gatanu.
Ikipe ya Real Madrid yemeje ayo makuru binyuze mu itangazo, ivuga ko uyu rutahizamu yasanzwemo imvune mu mukaya wo mu kuguru kwe kw'ibumoso, bityo bakaba bagikurikirana uko ubuzima bwe buzagenda bumera mu minsi iri imbere.
Kuri ubu Real Madrid iri inyuma ya Barcelona iyoboye urutonde rwa Shampiyona n'ikinyuranyo cy'amanota 11 mu gihe habura imikino itanu gusa ngo umwaka w'imikino urangire.
Biteganyijwe ko iyi kipe izasura Espanyol ku Cyumweru mbere yo kwerekeza kuri Nou Camp gukina na Barcelona tariki ya 10 Gicurasi.
Ibi bibaye nyuma y'uko iyi kipe isezerewe muri UEFA Champions League na Bayern Munich mu cyumweru gishize, ibintu bishyira Real Madrid mu byago byo gusoza uyu mwaka w'imikino nta gikombe na kimwe yegukanye.
Kylian Mbappe wari wabanje gusiba hafi ukwezi kose mu ntangiriro z'uyu mwaka kubera ikibazo cy'imvune yo mu ivi, amaze gutsinda ibitego 24 mu mikino 28 ya La Liga ndetse n'ibitego 15 mu mikino 11 ya Champions League muri uyu mwaka w'imikino.
Iyi mvune yagize inateye impungenge, dore ko Imikino y'Igikombe cy'Isi kizabera muri Leta Zunze Ubumwe za Amerika, Canada na Mexique iteganyijwe gutangira mu mezi ari imbere tariki ya 11 Kamena.
Leave a Comment