Nyuma y'uko Erling Haaland wa Manchester City atangiye neza umwaka w'imikino, yongeye kugaragara kuri uru rutonde ruriho abakandida batandatu. Igihembo cy'umukinnyi w'ukwezi agihataniye na Daichi Kamada wa Crystal Palace, Yankuba Minteh, Robin Roefs na Granit Xhaka ba Sunderland ndetse na Martin Zubimendi ukinira Arsenal. 

Mu bahatanye bose, Haaland ni we wenyine nibura wigeze kwegukanaho iki gihembo.

 Igihembo cy'ukwezi kwa Kanama cyegukanwe na Jack Grealish nyuma yo kugira intangiriro nziza mu ikipe ya Everton yagezemo akubutse muri Man City.

Abatoza bahataniye Igihembo cy'Umutoza w'Ukwezi ni: Mikel Arteta, Oliver Glasner, Pep Guardiola na Regis Le Bris.

Mu kwezi gushize, Arteta yafashije Arsenal gutsinda Nottingham Forest ndetse na Newcastle United, ananganya na Manchester City.

Umutoza Glasner uri mu bakomeje kugarukwaho n'abatari bake mu bakunzi ba ruhago muri iyi minsi, bitewe n'ukuntu ikipe ye iri kwitwara neza, yatsinze Liverpool ibitego 2-1, ndetse anabona intsinzi Crystal Palace yakuye kuri West Ham, ananganya na Sunderland.

Manchester City y'umutoza Guardiola, mu kwezi gusoje yaguye miswi na Arsenal igitego 1-1, itsinda mukeba Manchester United, ndetse inabona intsinzi imbere ya Burnley mu mpera z'icyumweru gishize.

Umutoza Le Bris na we yafashije Sunderland gusoza ukwezi idatsinzwe kandi ininjijwe igitego kimwe gusa. Sunderland yanganyije na Aston Villa na Crystal Palace mbere yo kubona amanota atatu imbumbe imbere ya Nottingham Forest.

Abazegukana ibihembo bazatangazwa ku wa Gatanu, tariki 10 Ukwakira.