Ikipe ya Rayon Sports WFC yateye intambwe ikomeye igana ku kwegukana Igikombe cya Shampiyona y’Icyiciro cya Mbere mu Bagore nyuma yo gutsinda Police WFC igitego 1-0 mu mukino w'ishiraniro.
Uyu mukino w'umunsi wa 19 wa Rwanda Women Super League wabereye mu Nzove kuri uyu wa Gatatu, wasize iyi kipe yambara ubururu n'umweru yigaranzuye Police WFC yari yayitsinze mu mukino ubanza.
Igitego rukumbi cya Rayon Sports cyinjiye mu minota y'inyongera gitsinzwe na Umwariwase Djuda ku munota wa 90+3.
Ibi byatumye Gikundiro ihita iyobora urutonde rwa shampiyona n’amanota 54, ishyiramo ikinyuranyo cy'amanota atatu hagati yayo na Police WFC.
Mu gihe habura umukino umwe gusa ngo shampiyona isozwe, Rayon Sports WFC irasabwa kunganya gusa mu mukino utaha izahuramo na Muhazi United kugira ngo yegukane igikombe.
Ku rundi ruhande, ikipe y'abashinzwe umutekano ya Police WFC izasoza yakira Inyemera WFC, isengera ko Rayon Sports yakora amakosa yo gutsindwa.
Leave a Comment