‎Ishyirahamwe ry'Umupira w'Amaguru ku Isi (FIFA) ryakuyeho ibihano ryari ryafatiye ikipe ya Rayon Sports biyibuza kwandikisha abakinnyi bashya. Iki cyemezo cyafashwe nyuma y'uko iyi kipe igaragaje ibimenyetso simusiga ko yakemuye mu bwumvikane ikibazo yari ifitanye n'umunyezamu wayo Drissa Kouyaté.
‎
‎Ibi bihano byari byashyizweho ku wa Mbere w'iki cyumweru nyuma y'uko iyi kipe yari yatsinzwe urubanza yarezwemo n'uyu munyezamu w'Umunya-Mali.
‎
Ibaruwa FIFA yandikiye Rayon Sports kuri uyu wa Gatanu ikanamenyesha FERWAFA, yashimangiye ko iyi kipe yari yemerewe gukomeza igikorwa cyo kwandikisha abakinnyi bayo nta nkomyi.
‎
‎Ubuyobozi bwa Rayon Sports bwari bwamaze kwizeza abafana ko ibintu byasubijwe mu buryo mbere y'uko FIFA ikuraho ibi bihano.
‎
Bwagize buti "Ubuyobozi bwa Rayon Sports bwamaze gushyikiriza FIFA inyandiko zemeza ubwumvikane bwagezweho hagati y’impande zombi, turamenyesha abakunzi bacu ko Drissa Kouyaté akiri umukinnyi wacu."
‎
‎Uku gukomorerwa guhaye ihumure Gikundiro yari imaze kugura abakinnyi 15 bashya ndetse n'abatoza bungirije barimo Habimana Sosthène na Hugo Tricárico.
‎
Iyi kipe yari imaze iminsi mu mwiherero mu Karere ka Gicumbi yitegura umukino wa gicuti na Gor Mahia uteganyijwe kuri Rayon Day y'uyu mwaka iraba kuri uyu wa Gatandatu tariki 18 Nyakanga, saa Kumi n'ebyiri z'umugoroba kuri Kigali Pele Stadium ndetse na CECAFA Kagame Cup izaba mu mpera z'uku kwezi.