Ikipe ya Rayon Sports yemeje ko yatandukanye n'Abanya-Tunisie, Mohammed Chelly ndetse n'Umutoza Wungirije, Azouzi Lotfi kubera umusaruro muke. 

Ku mugoroba wo kuri uyu wa Kabiri ni bwo aba bombi basinye impapuro zigaragaza ko baciye ukubiri n'ikipe ndetse ko nta n'ikibazo bazateza ku bijyanye no gushora ikipe mu manza. 

Kugira ngo Mohammed Chelly yemere gutandukana n'iyi kipe, yahembwe imishahara y'ukwezi k'Ukwakira ndetse n'Ugushyingo yari agezemo hagati akiri mu kazi, kongeraho ukwezi k'Ukuboza na ko yahawe nk'imperekeza y'ubutane.

Chelly w'imyaka 24 yasinyiye Rayon Sports muri Nyakanga 2025, asinya amasezerano y'umwaka umwe n'ubwo agiye nyuma y'amezi ane gusa. 

Kuva yagera muri iyi kipe ntiyabonye umwanya uhagije wo kwiyereka abakunzi bayo bitewe n'urwego rwe rutari hejuru ndetse n'ibibazo by'imvune zamukomye mu nkokora. 

Mohamed ukina mu kibuga hagati asatira yaje mu Rwanda avuye muri Océano Club de Kerkennah yo mu cyiciro cya kabiri muri Tunisia kuva 2022-2025. Yanyuze no muri Sfax Railway Sport y’iwabo kuva mu 2018-2021.

Yakiniye kandi ikipe y’igihugu y’abatarengeje imyaka 23 ‘Les Aigles de Carthage’.

Umutoza Azouzi Lotfi na we waziye rimwe n'uyu mukinnyi, ntiyigeze yishimirwa na Komite Nyobozi ya Rayon Sports itarumvaga impamvu izana umutoza udafite ibyangombwa bimwemerera gutoza imikino ya CAF Confederation Cup nk'Umwungiriza wa Mbere; ibyatumye bazana Umurundi, Haruna Ferouz, kuri ubu wasigaranye ikipe nyuma y'uko Gikundiro ihise gutandukana na Afhamia Lotfi ndetse n'uyu mwungiriza yizaniye. 

Iyi kipe yambara ubururu n'umweru ikomeje imyitozo mu Nzove yitegura AS Kigali mu mukino w'umunsi wa munani bazakina ku Cyumweru. 

Abakunzi b'iyi kipe kandi barishimira ko yagaruye ba rutahizamu bayo, Fall Ngagne na Ndikumana Asman biteguye gutangira gukina nk'uko ikipe yabitangaje binyuze ku mbuga nkoranyambaga zayo.