Umutoza Mukuru w’Ikipe y’Igihugu y’Umukino w’Amagare (Team Rwanda), Sempoma Félix, yatangaje urutonde rw’abakinnyi batanu bazaserukira igihugu muri Tour du Rwanda 2026, urutonde rugaragaraho umwihariko w’uko Ufitimana Shadrack agiye gukina iri siganwa bwa mbere mu mateka ye.
Iri siganwa mpuzamahanga rizenguruka u Rwanda, rigiye gukinwa ku nshuro ya 18 kuva ribaye mpuzamahanga, rizatangira ku wa 22 Gashyantare risozwe ku wa 1 Werurwe 2026.
Mu bakinnyi batanu Sempoma yagiriye icyizere, harimo Byukusenge Patrick, Ufitimana Shadrack, Nsengiyumva Shemu, Tuyizere Etienne na Nkundabera Eric.
Iyi kipe izaba iyobowe na Sempoma Félix nk'Umutoza Mukuru, afatanyije n'umuganga Ruvogera Obed ndetse n'umukanishi Karasira Théoneste.
Mu gihe habura iminsi ine gusa ngo isiganwa ritangire, amakipe yo hanze yatangiye kugera mu Rwanda. Ikipe ya Rembe–Rad-Net yo mu Budage yamaze kugera i Kigali, mu gihe andi makipe arimo Picnic, Lotto, Soudal na Movistar ategerejwe ku wa Kane, tariki ya 19 Gashyantare.
Umuhuzabikorwa wa Tour du Rwanda, Nkurayija Hubert, yemeje ko umubare w’amakipe azitabira uyu mwaka wamaze kuzura ari 18.
Muri aya makipe harimo Bike Aid yo mu Budage isanzwe imenyerewe i Kigali, ndetse n’ikipe nshya yiswe ‘Mixed West Africa’ igizwe n’abakinnyi bo muri Côte d’Ivoire, Mali na Burkina Faso, yashyiriweho guha amahirwe abakinnyi bo muri ako gace.
Muri uyu mwaka, isiganwa rizagaragaramo amakipe akomeye arera abakinnyi bakiri bato b'amakipe asanzwe akina Tour de France (World Tour Devo Teams) nka UAE Team Emirates Gen Z, Movistar, NSN, Soudal Quick Step, Picnic PostNL na Lotto Intermarché.
Mu makipe mpuzamigabane (Continental Teams) hazaba harimo Team Amani, Benediction Kitei Pro 2020, May Stars, Madar, Rembe Rat na Localiza Meoo/Swift Pro Cycling. Ku rwego rw’amakipe y’ibihugu (National Teams), u Rwanda ruzaba ruhanganye na Eritrea, Afurika y’Epfo na Ethiopia.
Tour du Rwanda ya 2026 izaba ari yo ya kabiri ifite intera ndende (ibilometero 993) mu myaka ya vuba, inyuma y’iya 2023 yareshyaga n'ibilometero 1129.
Agace ka mbere ari nako karekare kurusha utundi, kazahaguruka i Rukomo mu Karere ka Gicumbi kerekeza i Rwamagana ku ntera y’ibilometero 174. Kazakurikirwa n’agace ka Nyamata - Huye (ibilometero 135) hamwe n'aka Huye - Rusizi (ibilometero 144).
Nyuma yaho, isiganwa rizakomereza mu Ntara y'Iburengerazuba n'Amajyaruguru: Karongi - Rubavu (km 127), kuzenguruka i Rubavu (km 82), na Rubavu - Musanze (km 84).
Isiganwa rizasozwa n'uduce tubiri dukomeye turimo akazava i Musanze gasorezwe kuri Kigali Pelé Stadium (km 147), mu gihe ku munsi wa nyuma, tariki ya 1 Werurwe, abakinnyi bazazenguruka mu Mujyi wa Kigali ku ntera y'ibilometero 99.
