Umunya-Espagne Pau Martí Soriano ukinira Ikipe ya NSN Development Team yegukanye Agace ka Kabiri ka Tour du Rwanda 2026, kahagurukiye i Nyamata mu Karere ka Bugesera kerekeza mu Mujyi wa Huye ku ntera y’ibilometero 134,6.
Kuri uyu wa Mbere, tariki ya 23 Gashyantare 2026, nibwo uyu mukinnyi w'imyaka 21 yakoresheje amasaha atatu n'amasegonda icumi n'ibyijana mirongo itatu (3:10:10.30), atanga ku murongo Henok Mulubrhan wo muri Eritrea na Mauro Cuylits wa Lotto-Groupe Wanty, bose bagereye ku murongo hamwe mu gikundi.
Gutsinda aka gace byahise bihesha Martí kwambara umwambaro w’umuhondo awambuye mugenzi we bakinana Itamar Einhorn wari wawegukanye ku Cyumweru, kuko we atabashije kuza mu bakinnyi 40 ba mbere kuri uyu wa Mbere.
Martí yafashijwe n'amasegonda 10 y'inyongera (bonifications) yahawe nk'umukinnyi wa mbere wageze ku Mberabyombi i Huye.
Isiganwa ryahagurutse i Nyamata saa Sita zuzuye ryitabiriwe n'abakinnyi 78 gusa, nyuma y'uko batandatu basezerewe mu Gace ka Mbere ku mpamvu zitandukanye.
Akimara kurenga ibilometero bya mbere hatangira kubarwa ibihe, abakinnyi batatu barimo Miguel Heidemann wa REMBE | rad-net, Martins wa Localiza Meoo n'Umunya-Afurika y'Epfo Erasmus wa Tshenolo Pro Cycling bahise bacika igikundi, barayobora.
Aba bakinnyi bagumanye imbere igihe kirekire, aho banagiye basaranganya amanota y'inzira. Miguel Heidemann yegukanye amanota n'amasegonda ya Sprint ya Mbere yatangiwe ku Ruhuha n'iya Kabiri yatangiwe i Nyanza, ndetse yegukana n'Umusozi wa Mbere wa Nyamiyaga, mu gihe Martins we yegukanye Umusozi wa Kabiri i Gasoro.
Ku rundi ruhande, Umunyarwanda Uwiduhaye Mike wa Benediction Banafrica Team yagerageje gushaka aba bakinnyi bari imbere ariko asigwa amasegonda agera kuri 40, biza kurangira afashwe n'igikundi nyuma y'ibilometero 14 gusa.
Ahagana mu bilometero 20 bya nyuma, igikundi kiyobowe n'Ikipe ya NSN Devo Team na Eritrea cyongereye umuvuduko mu buryo bukomeye, gitangira kugabanya ikinyuranyo cyari cyashyizwemo n'abakinnyi bari imbere kugira ngo kibafate.
Isiganwa ryinjiye mu Mujyi wa Huye abakinnyi bose bagendera hamwe nk'igikundi kimwe kiyobowe n'ikipe y'Igihugu ya Eritrea yarimo Henok Mulubrhan na Merhawi Kudus. Mu bilometero bibiri bya nyuma, amakipe arimo Soudal Quick-Step na NSN yatangiye gushaka imyanya myiza imbere yitegura umurongo (positioning).
Pau Martí yakoresheje neza ubuhanga bwe bwo kwihuta yototera umurongo (sprint) imbere y'Imberabyombi i Huye, asiga abandi yegukana intsinzi.
Iyi ibaye intsinzi ya kabiri yikurikiranya ku ikipe ya NSN Development Team muri iri siganwa ry'uyu mwaka.
Nyuma y'aka gace, hatanzwe ibihembo bitandukanye aho Miguel Heidemann yahembwe nk'uwahize abandi muri sprint, mu kuzamuka, no kuba umukinnyi wayoboye isiganwa igihe kirekire. Uwiduhaye Mike yahembwe nk'Umunyarwanda mwiza, Henok Mulubrhan aba Umunyafurika mwiza, naho Lotto-Groupe Wanty ihabwa igihembo cy'ikipe nziza y'umunsi.
Tour du Rwanda 2026 izakomeza ku wa Kabiri, tariki ya 24 Gashyantare, hakinwa Agace ka Gatatu kazahagurukira i Huye saa 11:00 kagasorezwa i Rusizi ku ntera y'ibilometero 145,3.
