Nyuma yo kugira umwaka mwiza w'imikino wa 2024/2025 mu ikipe ya Rayon Sports, Umurundikazi Bizimana Rukia yamaze
kwerekeza mu ikipe ya Police WFC, aho yayisinyiye amasezerano y'umwaka umwe ushobora kongerwa.
Bizimana Rukia ufatwa nka numero ya mbere mu Rwanda mubakinnyi bakina basatira banyuze kuruhande
rw'ibumoso ahazwi nko kuri 11, yamenyekanye mu Rwanda ubwo yakiniraga Rayon Sports y'Abagore mu mwaka w'imikino
wa 2024/2025, ubwo yayisinyiraga umwaka umwe avuye mu ikipe yo mu Burundi yitwa PVP Buyenzi.
Rukia yafashije ikipe ya Rayon Sports kwegukana ibikombe bitandukanye birimo igikombe cya Shampiyona, Igikombe cy'Intwali, Igikombe cy'umunsi mpuzamahanga w'Umugore ndetse anayifasha kwegukana umwanya wa 2 mu Gikombe cy'Amahoro.
Mu mikino 19 ya Shampiyona yakiniye ikipe ya Rayon yagize uruhare mu bitego 16, aho yatsinze ibitego 7 anatanga imipira
9 yanyuma yavuyemo ibitego.
Mu mwaka w'imikino wa 2024/2025 ikipe ya Police yasoreje ku mwanya wa 5 n'amanota 28, aho yarushwaga amanota 29 na
Rayon Sports yegukanye igikombe, ikaba yaranegukanye umwanya wa Gatatu mu gikombe cy'Amahoro.
Muri uyu mwaka Ikipe ya Police WFC ifite intego yo gutwara kimwe mu bikombe 2 bikomeye bikinirwa mu Rwanda (Shampiyona,
n'Igikombe cy'Amahoro), nkuko umwe mubayobozi ba Police babitangarije Kinyamupira.
Leave a Comment