‎Ikipe ya Arsenal yageze ku mukino wa nyuma w’igikombe cya EFL Cup (Carabao Cup) ku nshuro ya mbere kuva mu 2018, nyuma yo gutsinda Chelsea igitego 1-0 mu mukino wo kwishyura wa 1/2 wabereye kuri Emirates Stadium kuri uyu wa Kabiri.
‎
‎Iyi ntsinzi yabonetse mu minota ya nyuma, yatumye Arsenal ikomeza ku giteranyo cy’ibitego 4-2, dore ko yari yatsinze umukino ubanza ibitego 3-2.
‎
‎Byasabye gutegereza umunota wa 97 (90+7) kugira ngo Kai Havertz wari winjiye mu kibuga asimbura, atsinde igitego kimwe rukumbi cyabonetse muri uyu mukino, ku mupira mwiza yahawe na Declan Rice, agacenga umunyezamu Robert Sanchez mbere yo kwinjiza umupira mu izamu.
‎
‎Umutoza wa Chelsea, Liam Rosenior, yari yahinduye amayeri ugereranyije n’umukino ubanza, aho yakoresheje ba myugariro batanu inyuma mu rwego rwo kwirinda amakosa yari yatumye batsindwa ibitego byinshi mu mukino ubanza, byatumye Arsenal itabona uburyo bwinshi bwo gutsinda mu gice cya mbere.
‎
‎N’ubwo Chelsea yagerageje kwinjiza mu kibuga abakinnyi basatira nka Estevao na Cole Palmer mu gice cya kabiri kugira ngo ishake igitego, ubwugarizi bwa Arsenal bwari buhagaze neza bwabashije kubakumira kugeza umukino urangiye.
‎
‎Iyi ntsinzi iraha Arsenal amahirwe yo kwegukana igikombe cya mbere gikomeye kuva mu 2020 ubwo yatwaraga FA Cup.
‎
Iyi kipe ya Mikel Arteta, kugeza ubu iri ku mwanya wa mbere muri Premier League, izahura ku mukino wa nyuma uzabera i Wembley n’ikipe irava hagati ya Manchester City na Newcastle United zirakina uyu munsi.
‎
‎Arsenal yaherukaga kugera ku mukino wa nyuma w’iri rushanwa mu 2018, aho yatsinzwe na Manchester City.
‎
Kuri ubu, abafana ba ‘The Gunners’ bafite icyizere ko uyu mwaka w’imikino ushobora kubasigira ibyishimo, dore ko ikipe yabo ihagaze neza haba muri Shampiyona ndetse no ku ruhando rw'i Burayi.