Mu mikino yabaye mu ijoro ryo ku wa Gatatu tariki ya 18 Werurwe 2026, ikipe ya FC Barcelone yo muri Espagne yerekanye urwego ruri hejuru ubwo yanyagira Newcastle United yo mu Bwongereza ibitego 7-2 mu mukino wabereye kuri Spotify Camp Nou. Ibi byatumye Barcelona ikomeza ku giteranyo cy'ibitego 8-3 kuko umukino ubanza zari zanganyije 1-1.
Ibitego bya Barcelone byatsinzwe na Raphinha ndetse na Robert Lewandowski buri wese watsinze bibiri, mu gihe ibindi byashyizwemo na Lamine Yamal kuri penaliti, Marc Bernal na Fermín López. Impozamarira za Newcastle United zatsinzwe na Anthony Elanga wenyine watsinze ibitego bibiri.
Undi mukino wari utegerejwe na benshi wahuje Liverpool yo mu Bwongereza yari yakiriye Galatasaray yo muri Turukiya kuri Anfield. Liverpool yari ifite akazi katoroshye ko kwishyura igitego 1-0 yari yatsinzwe mu mukino ubanza i Istanbul, ariko yabyitwayemo neza inyagira Galatasaray ibitego 4-0 ihita iyisezerera ku giteranyo cy'ibitego 4-1.
Ibitego bya Liverpool byabonetse binyuze kuri Dominik Szoboszlai wafunguye amazamu, mbere y'uko Hugo Ekitike, Ryan Gravenberch na Mohamed Salah batsinda ibindi mu gice cya kabiri.
Uyu Munyamisiri Mohamed Salah yanakoresheje uyu mukino yandika amateka yo kuba Umunya-Afurika wa mbere utsinze ibitego 50 muri Champions League n'ubwo yari yabanje guhusha penaliti mu gice cya mbere.
Mu wundi mukino, Bayern Munich yo mu Budage yihanije Atalanta yo mu Butaliyani iyitsinda ibitego 4-1, yuzuza igiteranyo cy'ibitego 10-2 mu mikino yombi.
Ibitego bya Bayern Munich byatsinzwe na rutahizamu Harry Kane watsinzemo bibiri yuzuza ibitego 50 muri iri rushanwa, Lennart Karl ndetse na Luis Diaz.
Ikipe ya Tottenham Hotspur yo mu Bwongereza n'ubwo yatsinze Atletico Madrid yo muri Espagne ibitego 3-2 mu mukino wo kwishyura wabereye i Londres, ntabwo byari bihagije ngo ikomeze kuko yasezerewe ku giteranyo cy'ibitego 7-5.
Ibitego bya Tottenham byatsinzwe na Xavi Simons watsinzemo bibiri na Randal Kolo Muani, naho ibya Atletico bitsindwa na Julian Alvarez na David Hancko.
Tombola y'imikino ya ¼ yasize hateganyijwe imikino ikomeye izahuza Real Madrid na Bayern Munich, Paris Saint-Germain izakina na Liverpool, FC Barcelona izahura na Atletico Madrid, mu gihe Arsenal izacakirana na Sporting Lisbon.
Imikino ibanza iteganyijwe tariki ya 7 n'iya 8 Mata 2026, naho iyo kwishyura ikinwe tariki ya 14 n'iya 15 Mata 2026.
Leave a Comment