Hakim Ziyech wakiniye amakipe akomeye i Burayi arimo Chelsea, yasinyiye Wydad Casablanca yo muri Maroc amasezerano y'umwaka umwe.
Uyu mugabo w'imyaka 32 nta kipe yari afite nyuma gutandukana na Al Duhail yo muri Qatar.
Ziyech usanzwe ukinira ikipe y'Igihugu ya Maroc, si ubwa mbere yari avuzwe muri Wydad kuko na mbere yo gukina Igikombe cy'Isi cy'Amakipe cyabereye muri Leta Zunze Ubumwe za Amerika muri Kamena 2025 yari yavuzwemo, ariko birangira atayisinyiye.
Asanzeyo Nordin Amrabat bakinana mu ikipe y'Igihugu, na we wasinyiye iyi kipe mu mpeshyi y'uyu mwaka, avuye muri Hull City yo mu Bwongereza.
Hakim Ziyech yanyuze mu makipe arimo, Heerenveen, Twente na Ajax zo mu Buholandi, akinira Chelsea imyaka itatu ndetse na Galatasaray yakiniye nyuma yo kuva mu Bwongereza.
Wydad Casablanca yatsinze Asante Kotoko yo muri Ghana igitego 1-0, mu mukino ubanza w'ijonjora rya kabiri rya CAF Champions League. Muri Shampiyona ya Maroc, iyi kipe yambara umutuku n'umweru iri ku mwanya wa kabiri n'amanota 10 mu mikino ine imaze gukina.
Leave a Comment