‎Umunyezamu wakiniye Ikipe y'Igihugu 'Amavubi' n'amakipe akomeye mu Rwanda, Kimenyi Yves, yatangaje ku mugaragaro ko asezeye burundu ku gukina umupira w'amaguru by'umwuga kuri uyu wa Gatanu, tariki ya 20 Gashyantare 2026.
‎
‎Iki cyemezo gikomeye gishingiye ku mvune ikomeye yagize mu mpera z'umwaka wa 2023, yatumye atabasha kongera gusubira mu kibuga ngo atange umusaruro ku rwego rwo hejuru yari amenyereweho.
‎
‎Kimenyi yavunitse tariki ya 29 Ukwakira 2023, ubwo ikipe ye ya AS Kigali yakinaga na Musanze FC mu mukino wa Shampiyona. Yagonganye bikomeye na rutahizamu Peter Agblevor, bimuviramo kuvunika amagufa abiri y'umurundi arimo Tibia na Fibula, ahita ajyanwa igitaraganya kubagirwa mu Bitaro bya Gisirikare i Kanombe.
‎
‎Nubwo yanyuze mu nzira ndende y'ubuvuzi n'ubugororangingo agerageza gushaka uko agaruka mu kibuga, umubiri we ntiwabashije kongera kwihanganira imyitozo ikarishye isabwa ku mukinnyi wabigize umwuga.
‎
‎Uyu munyezamu ashoje urugendo rwe asize amateka yihariye yo kuba umwe mu bakinnyi bacye babashije gukinira amakipe manini yose yo mu Rwanda bahagaze neza. Yazamukiye mu mashuri yigisha umupira arimo Imena Academy na Isonga FC, mbere yo kwerekeza muri APR FC yubakiyemo izina hagati ya 2014 na 2019, aho yatwaranye na yo ibikombe bya Shampiyona n'iby'Amahoro.
‎
‎Mu mwaka wa 2019, yerekeje muri mukeba, Rayon Sports, mu igura n'igurisha ryavugishije benshi, mbere yo kugurwa na Kiyovu Sports mu 2020 akayabo ka miliyoni 16 Frw, aho yahawe n'icyizere cyo kuba umwe mu ba kapiteni.
‎
AS Kigali ni yo kipe ye ya nyuma yakiniye mu cyiciro cya mbere.
‎
‎Ku rwego rw'igihugu, Kimenyi yahamagawe bwa mbere mu Amavubi mu 2017. Yibukirwa cyane ku ruhare yagize kuko yari mu bafashije u Rwanda kugera muri 1/4 cy'irushanwa rya CHAN 2020 ryabereye muri Cameroun.