‎Ikipe ya Manchester City yatsinze Arsenal mu mukino w'ishiraniro wabereye kuri Etihad Stadium, iyigabanyaho ikinyuranyo cy'amanota bituma yongera amahirwe akomeye mu rugamba rwo guhatanira Igikombe cya Shampiyona y'u Bwongereza. 

‎

‎Iyi ntsinzi yatumye Manchester City isigara irushwa na Arsenal amanota atatu gusa, ariko ikaba ifite umukino w'ikirarane itarakina. Ibi bivuze ko abasore ba Pep Guardiola bashobora gufata umwanya wa mbere baramutse batsinze ikipe ya Burnley mu mukino uteganyijwe ku wa Gatatu.

‎

‎Uyu mukino watangiranye ishyaka rikomeye, aho Rayan Cherki yafunguye amazamu ku ruhande rwa Manchester City nyuma yo gucenga abakinnyi ba Arsenal neza mbere yo kurekura ishoti rikomeye n'ukuguru kwe kw'iburyo. 

‎

‎Ibyishimo bya Man City ntibyamaze igihe kirekire kuko umunyezamu Gianluigi Donnarumma yakoze ikosa rikomeye ryahise ribyazwa umusaruro na Kai Havertz wari wamwokejeho igitutu maze atsinda igitego cyo kwishyura.

‎

‎Mu gice cya kabiri amakipe yombi yakomeje gushakisha igitego cy'intsinzi, dore ko Eberechi Eze wa Arsenal yateye umupira ugakubita igiti cy'izamu. 

‎

Nubwo bwose yari yakoze ikosa ryavuyemo igitego cya mbere, umunyezamu Donnarumma yaje kwikubita agashyi akuramo uburyo bwabazwe bwa Havertz.

‎

‎Uyu mukino waje kurangira Erling Haaland atsinze igitego cya kabiri cya Manchester cyanahesheje iyi kipe intsinzi. Iki gitego cya Haaland cyabaye icya kane uyu rutahizamu abashije gutsinda kuva uyu mwaka wa 2026 watangira.

‎

‎Uretse ibitego, uyu mukino waranzwe n'ihangana rikomeye rishingiye ku mbaraga hagati ya Haaland na myugariro wa Arsenal Gabriel. Iri hangana ryageze aho Gabriel aca amaboko y'umwenda Haaland yari yambaye ndetse bombi baza guhabwa amakarita y'umuhondo nyuma yo gushyamirana bashaka gukubitana imitwe. 

‎

Umusifuzi wa VAR John Brooks yemeje ko iri kosa ritari rikwiriye ikarita itukura.

‎

‎Kuri Arsenal, uku ni ukundi gutenguhwa kuko yinjiye muri uyu mukino imaze gutsinda umukino umwe gusa mu mikino itanu iheruka gukina mu marushanwa yose. Muri iki gihe kandi Manchester City yo yari imaze gutsinda imikino ikomeye irimo uwa Arsenal ndetse na Liverpool na Chelsea.

‎

‎Iyi kipe itozwa na Mikel Arteta itegereje umukino ukomeye izakiramo Newcastle United ku wa Gatandatu mbere yo gukina na Atletico Madrid mu mukino ubanza wa kimwe cya kabiri cya UEFA Champions League.