Mu mwaka  w'imikino urangiye, ibintu ntabwo byagenze neza muri Real Madrid. Ikipe yahuye n'ibibazo byinshi by'imbere, ndetse Barcelona itwara igikombe cya shampiyona nta nkomyi zikomeye ihuye nazo.

Perezida wa Real Madrid, Florentino Pérez, nyuma yo  kongera gutorerwa kuyobora iyi kipe, yazanye José Mourinho nyuma y'imyaka 13 avuye muri iyi kipe. Ubuyobozi bwa Real Madrid burashaka kongera kubaka ikipe, bukagura abakinnyi bashya kandi bugurisha abo butagikeneye.

Raporo ya Foot Mercato ivuga ko Eduardo Camavinga, Raúl Asencio, Fran García na Dani Ceballos bashobora kugurishwa, mu gihe Franco Mastantuono na Gonzalo García bashobora gutizwa mu zindi kipe.

Ejo hazaza ha Federico Valverde muri Real Madrid haracyari urujijo nyuma y'amakimbirane yagiranye  na aurélien Tchouaméni mu kwezi gushize. Nubwo bombi bahanwe, bivugwa ko Valverde ari we watangije ayo makimbirane.

Real Madrid kandi irashaka gusinyisha umukinnyi mushya wo hagati urinda ubwugarizi (No.6), aho Rodri wa Manchester City ari we uri ku isonga rw'abifuzwa. Naramuka ageze muri Real Madrid, umwanya wa Tchouaméni ushobora kujya mu kaga.

Manchester United iri gukurikiranira hafi ibi bibazo kuko Camavinga, Tchouaméni na Valverde bose bari mu bakinnyi INEOS (abayobozi bashya ba United) batekereza kuzana kugira ngo bakomeze hagati mu kibuga.

Umunyamakuru wo muri Espagne Miguel Serrano yavuze ko Real Madrid yemera kugurisha Eduardo Camavinga ku giciro cya miliyoni 43 z'amapawundi (£43m).Nubwo Camavinga yifuza kuguma muri Real Madrid no kongera kwisubiza umwanya ubanza mu kibuga, amakipe yo muri Premier League arimo Manchester United ashobora kubona ayo mafranga.

Ku ruhande rwa Federico Valverde, bivugwa ko Real Madrid yashyizeho igiciro cya miliyoni 86 z'amapawundi (£86m).Valverde afatwa nk'umwe mu bakinnyi bo hagati buzuye kurusha abandi ku isi muri iki gihe. Niba Manchester United yabasha kumugura, byahindura cyane imbaraga zayo hagati mukibuga