‎Myugariro w'Ikipe y'Igihugu 'Amavubi' usoje amasezerano muri APR FC, Niyigena Clément, yasigaye mu Misiri aho yamaze kumvikana n'Ikipe ya Ceramica Cleopatra FC yo mu Cyiciro cya Mbere yitegura no gukoreramo ikizamini cy'ubuzima.
‎
‎Amakuru y'uku kumvikana yatangajwe n'umunyamakuru wa RBA Nkurunziza Emmanuel uzwi nka 'Ruvuyanga' usanzwe uba hafi y'amakuru ya APR FC. Yemeje ko uyu myugariro natsinda ibi bizamini by'ubuzima ahita ashyira umukono ku masezerano yo gukinira iyi kipe iheruka gusoreza ku mwanya wa kane muri Shampiyona y'icyo gihugu.
‎
‎Ibi byatumye Niyigena asigara mu Murwa Mukuru Cairo mu gihe abandi bakinnyi b'Ikipe y'Igihugu bari bari kumwe mu mwiherero w'Amavubi mu Misiri bamaze kugera i Kigali mu gitondo cyo kuri uyu wa Kane.
‎
‎Kwerekeza mu mahanga kuri uyu mukinnyi ukina mu mutima w'ubwugarizi bije nyuma y'uko ubuyobozi bwa APR FC bwari bwamweretse ko bumukeneye cyane ndetse bunamuha amafaranga menshi ngo yongere amasezerano, ariko we akabona ko igihe cye cyo kujya gukina nk'uwabigize umwuga hanze y'u Rwanda cyageze.
‎
‎Niyigena si we mukinnyi wenyine w'Amavubi wasigaye mu Misiri kuko na rutahizamu Biramahire Abeddy wakiniraga Assabah FC yo muri Libya atasubiranye n'abandi mu Rwanda, kugira ngo na we agerageze gusoza ibiganiro n'amakipe amwifuza muri icyo gihugu.