Ikipe y'Igihugu y'u Bubiligi yakatishije itike ya 1/4 cy'Igikombe cy'Isi nyuma yo kunyagira Leta Zunze Ubumwe za Amerika ibitego 4-1 mu mukino wabereye mu mujyi wa Seattle mu rukerera rwo kuri uyu wa Kabiri.
Ibi bitego by'u Bubiligi byatsinzwe na Charles de Ketelaere winjije bibiri, Hans Vanaken atsinda icya gatatu ku ikosa ryakozwe n'umunyezamu Matt Freese, mu gihe Romelu Lukaku yashyizemo agashinguracumu mu minota y'inyongera ku rindi kosa rya ba myugariro.
Rutahizamu Malik Tillman ufite inkomoko mu Budage ni we wari watsindiye Amerika igitego cyo kwishyura ku munota wa 31.
Uku gutsindwa kwashyize iherezo ku rugendo rwa Leta Zunze Ubumwe za Amerika, biba igihugu cya nyuma mu byakiriye iri rushanwa gisezerewe.
U Bubiligi buzakina na Espagne muri 1/4 mu mukino uzabera i Los Angeles ku wa Gatanu, tariki ya 10 Nyakanga.
Uyu mukino wasizwe icyasha n'icyemezo cy'Impuzamashyirahamwe y'Umupira w'Amaguru ku Isi, FIFA, cyo gukuraho ikarita itukura yari yahawe rutahizamu w'Umunyamerika Folarin Balogun.
Uyu mukinnyi yabanje mu kibuga ariko ntiyagira icyo afasha ikipe ye. Ibi byakurikiye amakuru y'uko Perezida Donald Trump yavuganye na Perezida wa FIFA Gianni Infantino asaba ko iyi karita isuzumwa, bikarangira ihagaritswe mu gihe cy'umwaka umwe.
Amategeko ya FIFA abuza kwivanga kw'abanyapolitiki cyangwa za guverinoma mu mikorere y'amashyirahamwe y'umupira w'amaguru, aho mu bihe byashize ibihugu nka Kuwait na Indonesia byakuwe mu majonjora y'Igikombe cy'Isi cya 2018 kubera iri kosa.
Gianni Infantino yireguye avuga ko iki cyemezo cyafashwe n'Akanama gashinzwe imyitwarire mu buryo bwigenga kandi ko guhamagara kwa Trump nta ruhare byagize, mu gihe Trump na we yemeje ko yasabye gusa ko ikarita isuzumwa bushya.
Ubusabe bw'ishyirahamwe ry'umupira w'amaguru mu Bubiligi bwo kwamagana iki cyemezo bwateshejwe agaciro, ibyateye umujinya n'amagambo menshi mu nzego zitandukanye zirimo n'Impuzamashyirahamwe y'Umupira w'Amaguru i Burayi (UEFA) ndetse n'andi mashyirahamwe y'ibihugu n'abanyabigwi mu mupira w'amaguru.
Leave a Comment